بروقت انتخابات کے معاملے میں عدالت نے الیکشن کمیشن اور گورنر خیبرپختونخوا کو تحریری جواب جمع کرانے کا حکم دے دیا ہے۔

پشاور ہائی کورٹ میں پاکستان تحریک انصاف (پی ٹی آئی) کی جانب سے خیبرپختونخوا اسمبلی کے بروقت انتخابات کیلئے کیس کی سماعت جسٹس اشتیاق ابراہیم اور جسٹس ارشد علی نے کی۔

تحریک انصاف کے رہنما اعظم سواتی، اسد قیصر شبلی فراز اور شاہ فرمان عدالت میں پیش ہوئے۔

سماعت کے آغاز میں ایڈووکیٹ جنرل نے مؤقف پیش کیا کہ چیف سیکرٹری نے آج جواب جمع کیا، اس پر عدالت نے کہا کہ  گورنر نے جواب جمع نہیں کیا، گورنر ہمیں بتادیں کہ کیوں ابھی تک تاریخ نہیں دی۔

ایڈووکیٹ جنرل نے اپنے موقف میں کہا کہ آئین کے مطابق گورنر کے پاس تاریخ دینے کا وقت ہے۔ جسٹس ارشد علی نے کہا کہ اس پر بعد میں بات ہوگی، پہلے تحریری جواب دیں کہ پہلے خط کے جواب میں تاریخ نہیں دی۔

عدالت نے استفسار کیا کہ الیکشن کمیشن کو اگر تاریخ نہیں ملی تو کیا لائحہ عمل ہوگا۔ عدالت نے الیکشن کمیشن کو بھی تحریری جواب جمع کرانے کی ہدایت کردی۔

دوسری جانب تحریک انصاف کے وکیل نے لاہور ہائی کورٹ کا فیصلہ عدالت میں پیش کردیا۔

یہ خبر بھی پڑھیں: 90 دن میں انتخابات نہیں ہوئے تو آرٹیکل 6 لاگو ہوگا

پی ٹی آئی وکیل نے اپنے موقف میں کہا کہ الیکشن کمیشن کا خط، گورنر کا جواب اور صدر کا خط ریکارڈ پر موجود ہیں،  گورنر بہانے بنا کر تاریخ نہیں دینا چاہتے ہیں۔

عدالت نے حکم دیا کہ جمعرات تک تمام تحریری جواب جمع کرا دیں۔

بعداد ازاں پشاور ہائی کورٹ نے الیکشن کمیشن اور گورنر سے تحریری جواب طلب کر کے جمعرات تک سماعت ملتوی کردی۔