حکومتی اتحادی 33 حلقوں کے ضمنی انتخابات میں حصہ لینے کے خواہشمند ہیں۔

اس حوالے سے ذرائع نے بتایا کہ پی ڈی ایم اور پیپلز پارٹی ضمنی انتخابات میں ملکر حصہ لینے پر سنجیدگی سے غور کررہی ہے۔

ذرائع کا کہنا ہے کہ مولانا فضل الرحمان ضمنی انتخابات میں حصہ نہ لینے کا اعلان کرچکے ہیں جبکہ حکومتی اتحادیوں کی جانب سے ضمنی انتخابات میں شرکت پر منانے کی کوششیں جاری ہیں۔

ذرائع کے مطابق آصف زرداری کی تجویز دی ہے کہ ضمنی انتخابات میں میدان خالی نہ چھوڑا جائے۔

ذرائع نے مزید بتایا کہ ضمنی اںتخابات سے متعلق وزراء پر مشتمل کمیٹی تشکیل دے دی گئی تاہم تمام حلقوں پر متفقہ امیدوار لانے کی تجاویز پر بھی غور شروع کردیا گیا ہے۔

چند روز قبل پیپلز پارٹی نے قومی اسمبلی کے ضمنی انتخابات میں بھرپور حصہ لینے کا فیصلہ کرلیا تھا اور اس فیصلے سے پیپلزپارٹی نے پی ڈی ایم قیادت کو باضابطہ آگاہ بھی کر دیا تھا۔

پی پی ذرائع نے بتایا تھا کہ ضمنی انتخابات میں حصہ لینے کا فیصلہ پارٹی دباؤ پر کیا گیا تھا، پیپلزپارٹی کے رہنماؤں نے قیادت کو ضمنی انتخابات میں حصہ لینے کے فیصلے پر مجبور کیا تھا۔

پارٹی ذرائع کا کہنا تھا کہ پیپلز پارٹی اپنے سیاسی فیصلے لینے میں مکمل آزاد ہے، پیپلز پارٹی کسی جماعت یا گروپ کی ڈکٹیٹشن نہیں لے گی۔

بعدازاں پی ڈی ایم جماعتوں کی جانب سے قومی اسمبلی ضمنی انتخابات میں حصہ نہ لینے پر اتفاق کیا گیا تھا۔

 پی ڈی ایم جماعتیں پیپلز پارٹی کے امیدواروں کی حمایت کریں گی اور باضابطہ اعلان قیادت کی مشاورت کے بعد ایک دو روز میں کیا جائے گا۔

دوسری جانب پاکستان پیپلز پارٹی (پی پی پی) نے ضمنی انتخابات میں ٹکٹوں کی تقسیم کیلئے پارلیمانی بورڈ تشکیل دے دیا ہے۔

پیپلز پارٹی کی جانب سے پارلیمانی بورڈ میں بلاول بھٹو زرداری، فریال طالپور، یوسف رضا گیلانی اور نیر بخاری کو شامل کیا گیا ہے۔

گیارہ رکنی پارلیمانی بورڈ میں فرحت اللہ بابر، راجہ پرویز اشرف، مخدوم احمد محمود، محمد علی شاہ، میر چنگیز جمالی، فیصل کریم کنڈی اور نثار احمد کھوڑو بھی شامل ہیں۔

یہ بھی پڑھیں: الیکشن کمیشن نے 33 نشستوں پر ضمنی انتخابات کے اخراجات تیار کر لیے