پاکستان کے وزیر برائے سائنس و ٹیکنالوجی سینٹر شبلی فراز نے کہا ہے کہ آئین کے مطابق 90 دن میں انتخابات ہونے چاہیے، اگر انتخابات نہیں ہوئے تو آرٹیکل 6 لاگو ہوگا۔

شبلی فراز نے پشاور ہائی کورٹ کے باہر میڈیا سے گفتگو کرتے ہوئے کہا کہ الیکشن میں 90 دن سے 5 گھنٹے بھہ آگے نہیں جا سکتے۔

انہوں نے کہا کہ ملک میں فسطائیت کا بازار گرم ہے، ملک کو پولیس اسٹیٹ بنا دیا گیا ہے، کرپٹ اور نااہل حکمران ہم پر مسلط کر دیے گئے، ہمارے رہنماوں کو گرفتار کیا جا رہا ہے، فواد چوہدری، شیخ رشید اور ہمارے دیگر لیڈران کو گرفتار کیا گیا۔

شبلی فراز نے مزید کہا کہ عمران خان پر قاتلانہ حملے کے جے آئی ٹی کو سبوتاژ کیا گیا۔ ملک ایک سیاہ دور سے گزر رہا ہے، ملک کے مجموعی حالات کی وجہ سے عوام کے پاس جانے کا فیصلہ کیا۔

شاہ فرمان کی گفتگو

دوسری جانب خیبرپختونخوا کے سابق گورنر شاہ فرمان نے بھی ہائی کورٹ میں میڈیا سے گفتگو کرتے ہوئے کہا کہ عدالت نے گورنر اور صوبائی حکومت اور الیکشن کمیشن کو نوٹس جاری کیا ہے۔

انہوں نے کہا کہ گورنر کے پاس حط لکھنے کا اختیار نہیں وہ تاریخ دے گا، ہم عدالت کے پاس اس لئے آئے ہیں کہ حکومت کی نیت ٹھیک نہیں۔

پی ٹی آئی رہنما شاہ فرمان نے مزید کہا کہ گورنر کے پاس 36 دن ہے کہ وہ الیکشن کی تاریخ دے دی۔

شبلی فراز کی پیشی سے قبل گفتگو

پشاور ہائی کورٹ میں پیشی سے قبل شبلی فراز نے میڈیا سے گفتگو کرتے ہوئے کہا تھا کہ آئین اور قانون سے خود کو مبرا سمجھتے ہیں اس لئے ہر غیر آئینی قدم اٹھا رہے ہی۔ں

پی ٹی آئی رہنما نے کہا کہ ملکی معیشت کو داؤ پر لگا دیا گیا ہے، عدالت سے توقع رکھتے ہیں کہ وہ ہمیں انصاف دے گی۔

شبلی فراز نے کہا کہ عوام اور قوم کو انصاف عدالتوں کے سے ملے گا، اس وقت جو ہم پر مسلط ہیں وہ نہ آئین پر یقین رکھتے ہیں اور نہ قانون پر یقین رکھتے ہیں۔

انکا کہنا تھا کہ ہمارا مقابلہ ان لوگوں کے ساتھ ہے جو ملک کو تباہی کی جانب لے جا رہے ہیں، عمران خان اور اس کی پارٹی ملک کو حقیقی جمہوریت کی جانب لے جانا چاہتے ہیں۔

انہوں نے کہا کہ قانون کی بالادستی ہو اور لوگوں کو انصاف مل سکے، ہم انصاف کے حصول کے لئے عدالت آئے ہیں اور پشاور ہائی کورٹ انصاف دے گی۔

پی ٹی آئی رہنما نے مزید کہا کہ اے پی سی کے لئے باضابطہ دعوت نامہ نہیں دیا گیا، دعوت نامہ آئے گا تو اس حوالے سے سوچیں گے۔