پاکستان تحریک انصاف کے رہنما سینیٹر شبلی فراز نے کہا ہے کہ ایسے لوگوں سے سامنا ہے جو آئین و قانون نہیں مانتے۔

سینیٹر شبلی فراز نے پشاور میں میڈیا سے گفتگو کرتے ہوئے کہا کہ ملک کی معاشی، آئینی نظام ایک طرف کردیا گیا، وہ لوگ جو آئین پر عمل درآمد نہیں کرتے ان پر آئین کے مطابق آرٹیکل 6 لگ جائے گا۔

انہوں نے کہا کہ خیبر پختونخوا میں نگران حکومت کی آڑ میں جے یو آئی کی حکومت ہے، پنجاب اور خیبر پختونخوا میں غیر آئینی تبادلے ہورہے ہیں، خیبر پختونخوا میں نگران وزیر اعلیٰ کی بجائے اکرم دورانی فیصلے کررہے ہیں۔

شبلی فراز نے کہا کہ عدالت میں آئینی کی بالا دستی کے لئے لڑرہے ہیں، ملک کو چور، ڈاکوؤں سے آزاد کرنا ہے۔

پی ٹی آئی رہنما نے کہا کہ حکومت کو مہنگائی اور عوام کی کوئی فکر نہیں، اقتدار کو طول دینے کے لیے ہر حربہ استعمال کیا جارہا ہے۔

شبلی فراز نے مزید کہا کہ انہوں نے نیب کو دانتوں کے بغیر کردیا، یہ نیب قانون کو غیر مؤثر کرنے کے لیے ہی آئے ہیں، ہم واپس آتے ہی نیب قانون کو تبدیل کریں گے۔

 دوسری جانب سابق گورنر شاہ فرمان نے بھی میڈیا سے گفتگو کرتے ہوئے کہا کہ انتخابات کی تاریخ دینا الیکشن کمیشن نہیں بلکہ گورنر کی ذمہ داری ہے، الیکشن شیڈول کے لئے 54 دن چاہیے، اگر لیٹ ہوتا ہے تو 90 دن میں انتخابات نہیں ہونگے۔

شاہ فرمان نے مزید کہا کہ 22 فروری سے قبل ہمارے کیس کا فیصلہ ہو جائے گا، ہم پرامید ہیں کہ آئین کی پاسداری ہو گی۔

یہ بھی پڑھیں: انصاف کی فراہمی تک احتجاج جاری رہے گا، شبلی فراز

اس موقع پر ایڈووکیٹ معظم بٹ نے بھی گفتگو کرتے ہوئے کہا کہ الیکشن کمیشن نے عدالت میں جواب جمع کیا ہے اور کہا ہے گورنر ذمہ داری پوری نہیں کررہا ہے۔