وزیر داخلہ رانا ثناء اللہ خان نے کہا ہے کہ پاکستان اورسعودی عرب کے مابین برادرانہ تعلقات ہیں۔

تفصیلات کے مطابق وزیر داخلہ رانا ثناء اللہ خان کی سعودی عرب کے سفارتخانے سعودی سفیر عزت مآب نواف بن سعیدالمالکی سے ملاقات ہوئی جہاں سعودی سفیر نے وزیر داخلہ کا استقبال کیا۔

ملاقات میں پاک سعودی دو طرفہ تعلقات سمیت باہمی دلچسپی کے دیگرامور پر بات چیت ہوئی، پاکستان اور سعودی عرب کے درمیان روڈ ٹو مکہ پراجیکٹ کے معاہدے سےمتعلق پیش رفت کا جائزہ لیا گیا اور معاہدے کو حتمی شکل دے کر اسے مکمل طور پر فعال کرنے پر اتفاق بھی کیا گیا۔

اس موقع پر کہا گیا کہ سعودی نائب وزیر داخلہ اس معاہدے پر دستخط کرنے کے لئے جلد پاکستان کا دورہ کریں گے اور اس پراجیکٹ کے تحت حجاج کو آسان اور بلا رکاوٹ ایمیگریشن کی سہولت فراہم کی جائے گی، اس منصوبے کا جلد بڑے شہروں سے آغاز کیا جائے گا۔

وزیر داخلہ کے استفسار پر سعودی سفیر کی جانب سے سعودی جیلوں میں قید پاکستانیوں کی جلد رہائی کیلئے ہر ممکن کوشش کرنے کی یقین دہانی کروائی گئی۔

وزیر داخلہ نے دونوں برادر ممالک کے درمیان دوطرفہ تعلقات کو مزید مضبوط بنانے کے لیے سعودی سفیر کی کاوشوں کو سراہا۔

وزیر داخلہ رانا ثناء اللہ خان نے مزید کہا کہ پاکستان اورسعودی عرب کے مابین تاریخی، دیرینہ اوربرادرانہ تعلقات ہیں، پاکستان کے عوام خادمین حرمین شریفین سے خاص عقیدت اورمحبت رکھتے ہیں۔