وزارت داخلہ کی جانب سے امن و امان کی صورتحال کو یقینی بنانے اور قانون توڑنے والوں کو گرفتار کرنے کا فیصلہ کیا گیا ہے۔

تفصیلات کے مطابق اسلام آباد میں وفاقی وزیر داخلہ رانا ثناء اللہ خان کی زیر صدارت ملک میں امن وامان کی صورتحال کے حوالے سے اجلاس  منعقد ہوا۔

اجلاس میں وزیر داخلہ کو پی ٹی آئی کی جیل بھرو تحریک کے تناظر میں امن و امان کی صورتحال پر تفصیلی بریفنگ دی گئی اور ملک میں امن و امان کی صورتحال کو یقینی بنایا جائے گا اور قانون توڑنے والوں کو گرفتار  کرنے کا فیصلہ کیا گیا۔

فیصلے کے مطابق امن دشمنوں کا ریکارڈ رکھا جائے اور اسے ان کے کیریکٹر سرٹیفیکیٹ میں واضح کیا جائے گا۔

اس موقع پر وزیر داخلہ کا کہنا تھا کہ جیل بھرو تحریک کے اصل مقاصد ایک ڈرامہ رچانا، میڈیا کی توجہ حاصل کرنا، امن و امان کی صورتحال کو متاثر کرنا اور سیاسی عدم استحکام پیدا کرنا ہے تاہم قانون توڑنے والوں کے کے خلاف شواہد اکٹھے کر کے عوام کے سامنے لائے جائیں تاکہ قانون شکنوں کا اصل چہرہ بے نقاب ہو جبکہ خواتین اور غریب کارکنوں کی گرفتاری سے گریز کیا جائے۔

یہ بھی پڑھیں: ملک کو دہشتگردی کی نئی لہر کا سامنا ہے، وزارت داخلہ کا سینیٹ میں جواب

اسکے علاوہ وزیر داخلہ نے کراچی میں دہشت گردی کے حالیہ حملے کو موثر طریقے سے پسپا کرنے میں آئی جی سندھ اور پولیس فورس کے دلیرانہ کردار کو سراہا۔

خیال رہے کہ چیئرمین پی ٹی آئی عمران خان کی اعلان کردہ تحریک انصاف کی جیل بھرو تحریک کا آغاز کل لاہور سے ہوگا۔

اس تحریک کے آغاز پر دو بجے چیرنگ کراس لاہور میں پی ٹی آئی رہنما گرفتار یاں پیش کریں گے ۔

پہلے مرحلے میں سابق گورنرعمر سرفراز چیمہ ، سینیٹر ولید اقبال،سابق صوبائی وزیر ڈاکٹر مراد راس سمیت پارٹی رہنما محمد خان مدنی ،فواد رسول بھلر بھی 200 کارکنان سمیت گرفتاری دیں گے ۔