پنجاب میں الیکشن کی تاریخ کا تعین نہ ہوسکا، گورنر پنجاب بلیغ الرحمان کی زیر صدارت لاہور ہائیکورٹ کے احکامات کی روشنی میں ہونے والا مشاورتی اجلاس ختم ہوگیا۔

تفصیلات کے مطابق گورنر پنجاب بلیغ الرحمان اور سیکریٹری الیکشن کمیشن کی سربراہی میں مشاورتی اجلاس گورنر ہاوس میں منعقد ہوا جس میں ون پوائنٹ ایجندے پر اتفاق پایا گیا اور الیکشن سے متعلق لاہور ہائیکورٹ کے احکامات پر بھی غور کیا گیا۔

پنجاب میں الیکشن کی تاریخ کا تعین نہ ہوسکا، ذرائع #BOLNews #PunjabElections pic.twitter.com/8rNBFSNAbL

— BOL Network (@BOLNETWORK) February 14, 2023

اجلاس میں ہائی کورٹ کے احکامات کی روشنی میں گورنر پنجاب اور الیکشن کمیشن حکام میں تاریخ طے کرنے سے متعلق مشاورت بھی کی گئی۔

سیکریٹری الیکشن کمیشن نے اجلاس میں بریفنگ دی کہ ہائی کورٹ کا حکم ہے کہ الیکشن کمیشن گورنر پنجاب سے مشاورت کے بعد فوری تاریخ کا اعلان کرے۔

الیکشن کمیشن نے کہا کہ عدالت نے حکم دیا کہ آئین کے مطابق اسمبلی تحلیل ہونے کے 90 روز کے اندر الیکشن ہوں۔ آئین کا آرٹیکل 220 وفاقی اور صوبائی اداروں کو الیکشن کمیشن کی معاونت کا پابند کرتا ہے۔

سیکریٹری الیکشن کمیشن نے مزید کہا کہ آئین کی روشنی میں الیکشن کمیشن قانون کے مطابق الیکشن کا انعقاد کروانے کا مجاز ہے۔

دوسری جانب سیکریٹری اور ڈائریکٹر قانون الیکشن کمیشن کی جانب سے لاہور ہائی کورٹ کے فیصلے سے متعلق اجلاس میں بریفنگ دی گئی۔

ذرائع کے مطابق ڈائریکٹر قانون الیکشن کمیشن نے کہا کہ تاریخ دینا الیکشن کمیشن کا کام نہیں ہے، گورنر پنجاب تاریخ دیتا ہے۔

گورنر پنجاب بلیغ الرحمان نے اجلاس میں واضح کیا کہ اگر اسمبلی خودبخود تحلیل ہوتی ہے تو گورنر انتخابات کی تاریخ دینے کا پابند نہیں ہے۔

ترجمان گورنر پنجاب نے بتایا کہ لاہور ہائی کورٹ کے فیصلے میں کچھ امور اور گورنر کے مشاورتی کردار کے کچھ پہلو وضاحت اور تشریح طلب ہیں، جس کے لیے قانونی اور آئینی ماہرین سے مشاورت کے بعد عدالت سے رجوع کیا جائے گا۔

بعدازاں اجلاس میں ہائی کورٹ کے فیصلے کی تشریح کے لیے لاہور ہائی کورٹ سے دوبارہ رجوع کرنے کا فیصلہ کیا گیا ہے۔

واضح رہے کہ اجلاس میں سیکریٹری الیکشن کمیشن، چیف سیکریٹری، ایڈیشنل ڈائریکٹر جنرل، آئی جی پنجاب اور اسپیشل سیکریٹری الیکشن کمیشن شریک ہوئے۔