گورنر خیبر پختونخوا غلام علی نے کہا ہے کہ جھوٹ کی سیاست ختم کرنے کا وقت آگیا ہے۔

گورنر کے پی غلام علی نے پشاور میں میڈیا سے گفتگو کرتے ہوئے کہا کہ عمران خان ٹائیگر فورس کرم ایجنسی و دیگرعلاقوں میں بھیج دیں۔

اسمبلیاں توڑنے میں جلدی کرنے والے تھوڑا صبر کریں

انہوں نے کہا کہ الیکشن کمیشن آزاد آئینی ادارہ ہے، میری رائے کو غلط کہہ سکتا ہے، اسمبلیاں توڑنے میں جلدی کرنے والے تھوڑا صبر کریں۔

غلام علی نے کہا کہ سابق وزیراعلیٰ کسی ایک جنازے میں نہیں آئے، عمران خان کی اپنی حکومت میں پی ٹی آئی بلدیاتی الیکشن ہاری، پشاور کے 7 میں سے 6 میئرز دیگر جماعتوں کے ہیں۔

ریاست سے متعلق جھوٹ کی سیاست کرنا غداری سے بڑا جرم ہے

گورنر کے پی کا کہنا ہے کہ عمران خان قوم کے ذہنوں میں فورسز کیخلاف نفرت کا بیج بو رہے ہیں، عمران خان لاشوں پر بھی سیاست کررہے ہیں۔

غلام علی نے کہا کہ عمران خان کہتے ہیں 4سال کے دوران ایک حملہ نہیں ہوا، 2018 سے 2022 کے دوران 465 حملے ہوئے، حملوں میں 246پولیس اہلکار شہید اور 404 افراد زخمی ہوئے۔

انکا کہنا ہے کہ سیاستدانوں پر کیے گئے حملے رپورٹ میں شامل نہیں، ریاست سے متعلق جھوٹ کی سیاست کرنا غداری سے بڑا جرم ہے، جھوٹ کی سیاست ختم کرنے کا وقت آگیا ہے۔

الیکشن کمیشن کو خط میں واضح لکھا انتخابات کرائیں

انہوں نے کہا کہ عمران خان 6ماہ سے سڑکوں پر استعفے منظوری کیلئے گھوم رہے تھے، استعفوں کی منظوری کے بعد دھرنا دے رہے ہیں کیوں منظور کیے۔

گورنر خیبرپختونخوا نے مزید کہا کہ الیکشن کمیشن کو خط میں واضح لکھا انتخابات کرائیں، الیکشن کمیشن کو تجویز دی دہشت گردی کے خطرات کو بھی دیکھا جائے۔

یہ بھی پڑھیں: گورنر خیبرپختونخوا نے صوبہ میں انتخابات کے لیے تاریخ دیدی