پارٹی پالیسی کیخلاف بیان بازی کے معاملے پر مریم نواز نے کیپٹن (ر) صفدر کی سرزنش کردی ہے۔

اس حوالے سے ذرائع کا کہنا ہے کہ کیپٹن ریٹائرڈ صفدرکے انٹرویو پر مسلم لیگ نون کی قیادت ناراض ہے جبکہ چیف آرگنائزر مریم نواز کی جانب سے کیپٹن صفدر کی سرزنش کی گئی جبکہ پارٹی پالیسی کے خلاف بیان بازی سے بھی روک دیا گیا ہے۔

ذرائع نے بتایا کہ مریم نواز نے ہدایت کی رہنما بیان دیتے ہوئے پارٹی پالیسی کو مد نظر رکھیں اور جو پارٹی پالیسی سے ہٹ کر چلے گا اس کے خلاف ایکشن لیا جائے گا۔

ذرائع کا کہنا ہے کہ کپیٹن ریٹائرڈ صفدر کو اس پہلے بھی پارٹی پالیسی سے ہٹ کر بیان دینے پر شوکاز ہوچکا ہوا ہے تاہم مریم نواز جلد بطور چیف آرگنائزز پارٹی پالیسی کا ہدایت نامہ بھی جاری کریں گی۔

دوسری جانب پاکستان مسلم لیگ (ن) سوشل میڈیا ٹیم خیبرپختونخوا کا اجلاس  آج منعقد ہو جس کی صدارت سینئر نائب صدر اور پارٹی چیف آرگنائزر مریم نواز نے کی۔

اجلاس میں بات کرتے ہوئے مریم نواز کا کہنا تھا کہ ہماری پہچان آئین، اخلاق اور جمہوری اقدار ہیں، گالم گلوچ کا حصہ نہ بنیں، دلیل ،تہذیب اور سچائی سے جواب دیں ۔

انہوں نے کہا کہ پڑھے لکھے، مہذب اور ذہین نوجوانوں کو سوشل میڈیا ٹیم میں آگے لائیں اور نوجوان سوشل میڈیا کو معاشرے میں مثبت سوچ پھیلانے کا ذریعہ بنائیں۔