آئی جی خیبرپختونخوا معظم جاہ نے کہا ہے کہ امن وامان سے کسی کو نہیں کھیلنے دیں گے۔

آئی جی کے پی معظم جاہ نے پشاور خودکش حملے سے متعلق میڈیا سے گفتگو کرتے ہوئے کہا کہ سی سی ٹی وی میں خودکش حملہ آور کو پہچان لیا، حملہ آور پولیس وردی میں مرکزی دروازے سے اندر داخل ہوا، جیکٹ اور ماسک پہنا ہوا تھا، وردری کی وجہ سے چیک نہیں کیا جاسکا۔

ہشتگردوں کے نیٹ ورک کے قریب پہنچ چکے ہیں

انہوں نے کہا کہ میں نے خودکش حملہ آور کو ڈھونڈ لیا ہے، حملہ آور موٹرسائیکل خراب دکھا کر پیدل پولیس لائن میں داخل ہوا، حملہ آور 12بجکر 37منٹ پر داخل ہوا، حملہ آور اکیلا نہیں پیچھے پورا نیٹ ورک تھا، نیٹ ورک حملہ آور کی ریکی کر رہا تھا۔

معظم جاہ نے کہا کہ خودکش حملہ آور نے جیکٹ، ہیلمٹ اور ماسک پہنا ہوا تھا، حملہ آور موٹرسائیکل پر آیا، چیسز نمبر ٹریس کرلیا، موٹرسائیکل انجن کے چیسز نمبر مٹانےکی کوشش کی گئی۔

انکا کہنا تھا کہ جائے وقوعہ سے بال بیئرنگ ملے ہیں، 20 ہزار کالز کی جیوفینسنگ کرنی ہے تھوڑا ٹائم دیں، پشاور میں سیف سٹی نہیں، سی سی ٹی وی حاصل کررہے ہیں۔

آئی جی کے پی نے کہا کہ دہشتگردوں کے نیٹ ورک کے قریب پہنچ چکے ہیں، کے پی پولیس کے ساتھ ظلم کرنے والے نیٹ ورک کے قریب ہیں۔

معظم جاہ نے کہا کہ امن وامان سے کسی کو نہیں کھیلنے دیں گے، عوام کے جان ومال کے تحفظ کی قسم کھائی ہے۔

انہوں نے کہا کہ پولیس چیکنگ کیلئے گاڑی روکے گا تو آئی جی کو رکنا پڑے گا، پولیس آئی جی کی گاڑی بھی چیک کرسکتی ہے، پولیس نے میری گاڑی کی بھی چیکنگ کی۔

ہمارے جوانوں کے حوصلے بلند ہیں، لڑنے کیلئے تیار ہیں

انکا کہنا ہے کہ اپنے بچوں سے خون کے آخری قطرے تک لڑنے کا حلف لیا، ایک ایک شہید کے گھر میرے افسر گئے، ہرقسم کی مدد کی، ہمارے جوانوں کے حوصلے بلند ہیں، لڑنے کیلئے تیار ہیں۔

آئی جی کے پی نے کہا کہ عدم تحفظ کا سازشی بیانیہ اب ختم ہونا چاہیے، جنگ میں نقصان ہوتا ہے اور کرتے بھی ہیں، اپنے بچوں کو بتایا دشمن سے بدلہ لینے اور ڈھونڈنے کا راستہ موجود ہے۔

معظم جاہ نے کہا کہ میرے بچے کسی سے تحفظ نہیں مانگیں گے، میرے بچوں کی حفاظت کا ذمہ اللہ تعالیٰ نے لیا ہوا ہے، میرے بچے ملکی سلامتی کا تحفظ کریں گے۔

دہشتگرد کا پولیس یونیفارم میں آنا میری کوتاہی ہے

انہوں نے کہا کہ دہشتگرد مسجد کی پوری جگہوں سے واقف نہیں تھا، دہشتگرد کا پولیس یونیفارم میں آنا میری کوتاہی ہے، دھماکے میں میرے بچوں کی نہیں میری کوتاہی ہے۔

انکا کہنا ہے کہ پشاور میں ڈرون حملہ نہیں ہوا، کے پی پولیس نے کسی شہید کا بدلہ نہیں چھوڑا نہ چھوڑیں گے، شہید کا قاتل یا تو مارا گیا یا قانون نے سخت سزادی۔

اپنے بچوں کی لاشوں پر سیاست نہیں کرنے دونگا

آئی جی نے کہا کہ اپنے بچوں کا بدلہ لینے کی پوری کوشش کروں گا، مشکلات پیدا نہ کریں، اپنے بچوں کیلئے ہمیں کچھ کرنے دیں، میرے بچوں کی لاشوں پر سیاست نہ کریں، اپنے بچوں کی لاشوں پر سیاست نہیں کرنےدوں گا۔

معظم جاہ نے کہا کہ میرے بچوں کو احتجاج پر اکسانا زیادہ تکلیف دہ ہے، میرے جوانوں کو سڑکوں پر لانے کی سازش برداشت نہیں کرسکتا۔

انہوں نے کہا کہ پشاو ردھماکے کے بعد ہر کوئی سائنسدان بنا ہوا ہے، ہماری تکالیف میں اضافہ کرنا چھوڑدیں، شہداء کے قاتلوں کو ڈھونڈ کر قرار واقعی سزادیں گے۔

انکا کہنا ہے کہ سازشوں سے ہمارے جوانوں کو سڑکوں پر لانا برداشت نہیں کرسکتا، ہمارے بچوں کو احتجاج پر اکسانا ہماری تکلیف میں اضافہ کررہا ہے۔

ایک ایک شہید کا بدلہ لیں گے

آئی جی کے پی نے کہا کہ خیبرپختونخوا پولیس کے مسائل کو سمجھا جائے، قربانیاں رائیگاں نہیں ہونے دیں گے، ایک ایک شہید کا بدلہ لیں گے۔

معظم جاہ نے مزید کہا کہ پشاور دھماکے کے بعد سب تکلیف کی حالت میں ہیں، ہماری تکالیف میں اضافے کے بجائے مرہم رکھا جائے، ہم نے وردی ضرور پہنی ہے لیکن ہم بھی انسان ہیں، ہمارے بھی بچے ہیں، ہمیں بےحس نہ سمجھا جائے، ہمارے جوانوں کے حوصلے بلند ہیں، دہشت گردوں کے ماسٹرمائنڈ اور سہولت کاروں کو ڈھونڈیں گے۔