ملکی سیاسی قیادت و رہنماؤں پر ممکنہ دہشت گرد حملوں کے خدشے کے پیش نظر وفاقی وزارت داخلہ نے پیپلزپارٹی، ن لیگ اور تحریک انصاف رہنماؤں کی سیکیورٹی سخت کرنے کی ہدایت کردی۔

اس حوالے سے وزرات داخلہ صوبائی چیف سیکریٹریز اور محکمہ داخلہ کو الرٹ جاری کردیا گیا ہے۔

وفاقی وزارت داخلہ نے قانون نافذ کرنے والے اداروں، چاروں صوبوں کے آئی جیز اور چیف سیکریٹریز محکمہ داخلہ کو مراسلہ لکھ دیا۔

وزرات داخلہ کی جانب سے ہنگامی بنیاد پر الرٹ رہنے، پیپلزپارٹی، ن لیگ اور پی ٹی آئی کے سیاسی رہنماؤں کی سیکیورٹی سخت کرنے کی ہدایات جاری کردی گئی ہیں۔

جاری کردہ الرٹ کے مطابق چیئرمین تحریک انصاف عمران خان کے جلسوں اور تقریبات پر بھی دہشت گردی کی کارروائی ہوسکتی ہے، روکنے کے لئے قانون نافذ کرنے والے اداروں کو متحرک کیا جائے۔

وزارت داخلہ کی جانب سے مراسلے میں بتایا گیا ہے کہ ٹی ٹی پی سمیت دہشت گرد تنظیموں کی طرف سے دہشتگرد حملوں کا خدشہ ہے۔

دہشتگردی سے نمٹنے کیلئے اقدامات وقت کی اہم ضرورت ہیں

اس سے قبل قومی اپیکس کمیٹی کے اجلاس سے خطاب کرتے ہوئے وزیراعظم شہباز شریف نے کہا کہ دہشت گردی سے نمٹنے کے لیے اقدامات وقت کی اہم ضرورت ہیں اور  حکومت دہشت گردی کے خلاف تمام وسائل بروئے کار لائے گی۔

انہوں نے کہا کہ اختلافات بھلا کر ملکر قوم کو یکجا کرنا اور آگے بڑھنا ہے جس کے لئے ضروری ہے کہ  وفاق، صوبے، سیاسی جماعتیں ملکر دہشت گردوں کا مقابلہ کریں، وقت کی ضرورت ہے وفاق اور صوبے ملکر اس کی اونر شپ لیں۔

انہوں نے مزید کہا کہ ہمیں تنقید برائے تنقید سے پرہیز کرنا ہوگا کیونکہ پوری قوم دہشتگردی کے خلاف متحد ہے اور یہ وقت کی ضرورت ہے سیاسی و مذہبی جماعتیں بھی متحد ہوں۔

وزیراعظم کا کہنا تھا کہ دہشتگردی کے مکمل خاتمے تک سکون سے نہیں بیٹھیں گے، چیلنجز کے باوجود دہشت گردی پر قابو پانے کی کوشش کریں گے۔