الیکشن کمیشن اور گورنر پنجاب کو قانونی نوٹس بھیج دیا گیا ہے جس میں ہر صورت انتخابی شیڈول جاری کرنے کا مطالبہ کیا گیا ہے۔

تفصیلات کے مطابق انتخابی شیڈول جاری کرنے کے لئے شہری نے اپنے وکیل اظہر صدیق ایڈووکیٹ کے توسط سے الیکشن کمیشن اور گورنر پنجاب کو قانونی نوٹس بھجوا دیا ہے۔

نوٹس میں بتایا گیا ہے کہ لاہور ہائیکورٹ نے الیکشن کمیشن کو نوے روز میں انتخابات کرانے کا حکم دیا ہے جس کے تحت بارہ فروری کو بارہ بج کردس منٹ سے پہلےعدالتی حکم پر عمل کرنا قانونی تقاضا ہے تاہم اس اوقات کار کے بعد عدالتی حکم پرعمل درآمد کی معیاد ختم ہوجائے گی جو توہین عدالت ہے۔

یہ بھی پڑھیں: صوبائی اسمبلیوں میں انتخابات کا معاملہ، پی ٹی آئی رہنماؤں کی حکومت پر تنقید

نوٹس میں واضح کیا گیا ہے کہ الیکشن ایکٹ کے تحت سات دنوں میں الیکشن کمیشن نے انتخابی شیڈول جاری کرنا ہے اور الیکشن کرانے کے لئے ادارے کو 54 دن درکار ہیں۔

نوٹس میں کہا گیا ہے کہ الیکشن شیڈول جاری کرنا آئینی تقاضا ہے جبکہ گورنر نے پہلے بھی حلف توڑا اور انتخابی تاریخ نہیں دی، گورنر انتخابی شیڈول کے اجراء کےلئے مشاورت نہ کرنے پرتوہین عدالت کے مرتکب ہوں گے۔

نوٹس میں مطالبہ کیا گیا ہے کہ الیکشن کمیشن بھی آئینی ذمہ داری اداکرتے ہوئے انتخابی شیڈول جاری کرے اور اگر الیکشن شیڈول جاری نہ کیا گیا تو الیکشن کمیشن اور گورنر پنجاب کےخلاف توہین عدالت کی درخواست دائر کی جائے گی۔

خیال رہے کہ گزشتہ روز لاہور ہائیکورٹ نے تحریک انصاف کی درخواستیں منظور کرتے ہوئے کہا کہ الیکشن کمییشن انتخابی شیڈول جاری کرے اور الیکشن کمیشن 90 روز میں پنجاب میں الیکشن کروائے۔

یہ بھی پڑھیں: پنجاب میں انتخابی شیڈول جاری نہ کرنے کے خلاف درخواست کا عبوری تحریری فیصلہ جاری