گورنر پنجاب محمد بلیغ الرحمن نے کہا ہے کہ کسی کے مذہبی جذبات مجروح کرنا ناقابل قبول فعل ہے۔

تفصیلات کے مطابق گورنر پنجاب محمد بلیغ الرحمن سے الیگزینڈر جان ملک، بشپ ایمریٹس آف لاہور کی قیادت میں لاہور میں نئے تعینات ہونے بشپ، ندیم کامران نے چرچ آف پاکستان کے وفد کے ہمراہ ملاقات کی جس میں گورنر پنجاب نے بشپ ندیم کامران کو بشپ آف لاہور تعینات ہونے پر مبارکباد دی اور نیک خواہشات کا اظہار کیا۔

گورنر پنجاب نے اس موقع پر کہا کہ چرچ آف پاکستان کی سوئیڈن اور ہالینڈ میں قران پاک کی بے حرمتی کے واقعات کی مذمت اور اسلاموفوبیا کے خلاف آواز اٹھانا قابل تعریف ہے، سوئیڈن اور ہالینڈ میں قران پاک کی بے حرمتی کے گھناؤنے فعل نے امت مسلمہ کے مذہبی جذبات مجروح کیے ہیں۔

 معاشرے میں ایک دوسرے کی رائے کا احترام بقائے باہمی کے لیے ضروری ہے

ان کا کہنا تھا کہ کسی کے مذہبی جذبات مجروح کرنا ناقابل قبول فعل ہے، معاشرے میں برداشت، ایک دوسرے کی رائے کا احترام بقائے باہمی کے لیے بہت ضروری ہے۔

محمد بلیغ الرحمن نے کہا کہ امید ہے نئے بشپ آف لاہور، ندیم کامران بین المذاہب ہم آہنگی کے فروغ اور پرامن بقائے باہمی میں اپنا کردار ادا کریں گے۔

الیگزینڈر جان ملک نے اس موقع پر کہا کہ چرچ آف پاکستان نے ہر فورم پر سویڈن اور ہالینڈ میں قران پاک کی بے حرمتی کے واقعات کی سخت مذمت کی ہے۔