وزیر خارجہ بلاول بھٹو زرداری سے پاکستان میں ہنگری کے سفیر بیلا فزیکاس کی ملاقات ہوئی ہے۔

تفصیلات کے مطابق وفاقی دارالحکومت اسلام آباد میں ہونے والی ملاقات میں دو طرفہ تعلقات پر تبادلہ خیال کیا گیا۔

ملاقات کے دوران  پاکستان اور ہنگری کے درمیان مختلف شعبوں میں تعاون میں مذید اضافے پر بات چیت کی گئی۔

اس موقع پر وزیر خارجہ بلاول بھٹو نے کہا کہ پاکستان ہنگری کے ساتھ اپنے تعلقات کو بے پناہ اہمیت دیتا ہے۔

وزیر خارجہ سے ڈی جی عالمی ایٹمی توانائی ایجنسی کی ملاقات

اس سے قبل بلاول بھٹو زرداری سے عالمی ایٹمی توانائی ایجنسی (آئی اے ای اے) کے ڈی جی رفائیل ماریانوگروسی کی ملاقات ہوئی تھی جس میں باہمی دلچسپی کے  امور پر تبادلہ خیال کیا گیا تھا۔

ملاقات میں وزیر خارجہ نے اٹامک انرجی کو صحت، زراعت، صنعت اور بجلی کے شعبے میں استعمال کرنے کی اہمیت پر زور دیا۔

دوسری جانب ڈی جی انٹرنیشنل اٹامک انرجی ایجنسی   نے پاکستان کی نیوکلیئر صلاحیتوں کو سراہا۔

واضح رہے کہ عالمی ایٹمی توانائی ایجنسی (آئی اے ای اے) کے ڈی جی رفائیل ماریانو گروسی پاکستان کے 2 روزہ دورے پر اسلام آباد میں ہیں۔

وزیر خارجہ کی اسلام آباد میں شام کے سفارت خانے میں آمد

وزیر خارجہ بلاول بھٹو زرداری اسلام آباد میں شام کے سفارت خانے پہنچے اور شام کے سفیر سے پاکستان کی جانب سے اظہار افسوس کیا۔

وزیر خارجہ نے شام میں زلزلے سے ہونے والے قیمتی جانی اور مالی نقصان پر بھی افسوس کا اظہار کیا۔

اس موقع پر وزیر خارجہ بلاول بھٹو زرداری نے شامی سفارت خانے میں مہمانوں کی کتاب پر تاثرات بھی قلمبند کیے اور کہا کہ مشکل کی گھڑی میں پاکستان کی حکومت اور عوام شامی حکومت اور عوام کے ساتھ ہے۔