پی ٹی آئی خیبرپختونخوا کے ترجمان شوکت یوسفزئی نے کہا ہے کہ نگراں حکومت کی جانب سے مسلسل آئین کی خلاف وزری پر تشویش بڑھ رہی ہے۔

تفصیلات کے مطابق پی ٹی آئی خیبرپختونخوا کے ترجمان شوکت یوسفزئی اور بیرسٹر گوہر خان نے میڈیا سے گفتگو کرتے ہوئے کہا کہ نگراں حکومت کی جانب سے تبادلے و تعیناتی اختیارات سے تجاوز ہے اور بیوروکریسی کو کام ہی نہیں کرنے دیا جارہا ہے۔

انہوں نے کہا کہ نگراں حکومت الیکشن کرانے کیلئے آتی ہے لیکن یہ حکومت نگراں نہیں بلکہ پی ڈی ایم کی حکومت ہے، مولانا نے اپنا نمائندہ گورنر ہاؤس میں بٹھایا ہوا ہے اور گورنر ہاؤس سے نگراں حکومت چلائی جارہی ہے۔

انہوں نے مزید کہا کہ نگراں وزیر اعلیٰ کو یرغمال بنایا گیا، یہ شفاف انتخابات پر متاثر ہونگے اور  مسلسل آئین کی خلاف وزری پر تشویش بڑھ رہی ہے لگ رہا ہے یہ آئین مانتے ہی نہیں، مرضی کے تبادلے و تعیناتی کررہے ہیں۔

یہ بھی پڑھیں: پی ڈی ایم حکومت خیبر پختونخوا میں ترقی کو روکنے کے درپے ہے، شوکت یوسفزئی

اس موقع پر بیرسٹر گوہر خان کا کہنا تھا کہ الیکشن کمشن نے نگراں سیٹ اپ میں تبادلوں و تعیناتی پر پابندی لگائی ہے تاہم نگراں حکومت کے ہوتے ہوئے آئین وقانون کے مطابق تبادلے نہیں ہوسکتے ہیں۔

خیال رہے کہ  نگراں حکومت کی جانب سے تبادلے اورتعیناتی کے معاملے پر پی ٹی آئی رہنما اسد قیصر نے پشاور ہائی کورٹ میں درخواست دائر کردی۔

اسد قیصر کی جانب سے رٹ بیرسٹر گوہرعلی خان نے دائر کی جس میں انھوں نے مؤقف اختیار کیا کہ نگراں حکومت کی جانب سے تبادلے وتعیناتی غیر قانونی ہے، حکومت کی جانب سے تعیناتی وتبادلے شفاف انتخابات کے انعقاد پر اثر انداز ہوں گے۔

رہنما پی ٹی آئی کی جانب سے درخواست میں مؤقف اپنایا گیا کہ نگراں حکومت کے تبادلے اور تعیناتی الیکشن رولز کی خلاف وزری ہے، نگراں حکومت کے ذمہ داری تعیناتی وتبادلے نہیں بلکہ صرف شفاف انتخابات کرانا ہے۔

پشاور ہائی کورٹ میں دائر درخواست میں بیریسٹرگوہرعلی خان نے مؤقف اپنایا کہ سپریم کورٹ بھی اس تناظر میں کئی بار احکامات جاری کیے ہیں۔ استدعا ہے کہ نگراں حکومت کی جانب سے تبادلوں اورتعیناتی کا اعلامیہ کالعدم قرار دیا جائے۔