پاکستان تحریک انصاف کی سینیئر قیادت اور پارٹی کارکنان کی جانب سے جیل بھرو تحریک میں گرفتاری پیش کرنے والوں کیخلاف مقدمات درج کرنے کا سلسلہ شروع ہوچکا ہے۔

درج مقدمات میں تھانہ سول لائن میں دہشت گردی، حبس بجا روڈ بلاک، توڑ پھوڑ اور دیگر دفعات  شامل کی گئیں ہیں ۔

اس کے علاوہ ایف آئی آر میں بتایا گیا ہے کہ میاں عباد فاروق ساتھیوں سمیت پولیس پر حملہ کیا جبکہ سرکاری گاڑی کے شیشے توڑ دیئے باوردی اہلکاروں پر تشدد کیا ۔

یہ بھی پڑھیں: جیل بھرو تحریک کا آغاز، شاہ محمود قریشی سمیت پارٹی کی سینئر قیادت گرفتار

خیال رہے کہ میاں عباد فاروق اور زبیر نیازی سمیت 80 نامعلوم کے خلاف مقدمہ درج کیا گیا ہے۔

واضح رہے کہ گزشتہ روز جیل بھرو تحریک کے آغاز پر تحریک انصاف کے وائس چیئرمین شاہ محمود قریشی سمیت اسد عمر، عمر چیمہ، اعظم سواتی، محمد مدنی، زبیر نیازی اور دیگر کو گرفتار کیا گیا تھا ۔

ذرائع پنجاب حکومت کے مطابق تحریک انصاف کی جیل بھرو تحریک میں اب تک پی ٹی آئی کے ٹوٹل 81 لوگوں نے لاہور میں پولیس کو گرفتاری دی ۔

ذرائع نے بتایا کہ پولیس نے گرفتار کارکنوں کی گنتی مکمل کر کے رپورٹ پنجاب حکومت کو بجھوا دی، گرفتار کارکنوں اور قائدین کو فی الحال کوٹ لکھپت جیل میں رکھا گیا ہے ۔

دوسری جانب قیدیوں والی وین کوٹ لکھپت جیل پہنچی تو اس میں شاہ محمود قریشی ،اسد عمر،اعظم سواتی،عمر سرفراز چیمہ موجود تھے جب کہ پی ٹی آئی کارکنان کی بڑی تعداد بھی ساتھ موجود تھی۔

پی ٹی آئی کارکنان قیدیوں والی وین کی چھت پر بیٹھے ہوئے ہیں، حماد اظہر اور دیگر پی ٹی آئی رہنما اپنی اپنی گاڑیوں میں قیدیوں والی وین کے ساتھ کوٹ لکھپت پہنچے۔

یہ بھی پڑھیں: جیل بھرو تحریک، پی ٹی آئی کی سینئر قیادت کا کارکنوں کے نام پیغام