پاکستان مسلم لیگ (ن) کی چیف آرگنائزر مریم نواز شریف نے کہا ہے کہ اقلیتوں کے حقوق کا تحفظ ہمارے ایمان کا حصہ ہے۔

تفصیلات کے مطابق سینئر نائب صدر مریم نواز کی زیر صدارت پاکستان مسلم لیگ (ن) اقلیتی ونگ کا اجلاس لاہور میں منعقد ہوا جس میں پارٹی کے مائینارٹیز ونگ کے تنظیمی ڈھانچے اور کارکردگی کا جائزہ لیا گیا۔

اجلاس میں مائیناریٹیز ونگ کی سرگرمیوں کو تیز کرنے کے لئے تجاویز پر مشاورت ہوئی۔

اجلاس کے دوران مسیحی برادری کی جانب پی ٹی آئی کی جیل بھرو تحریک اور الیکشن کی تاریخ کا مسیحیوں کے پاک ایام سے متصادم ہونے پر احتجاج اور مذمت کی گئی۔

اقلیتوں نے پاکستان بنانے میں اہم کردار ادا کیا

مریم نواز نے اجلاس سے خطاب کرتے ہوئے کہا کہ  آج مسیحی برداری اپنا پہلا روزہ رکھ رہے ہیں اور آج سے جیل بھرو تحریک کا آغاز کیا گیا، صدر علوی نے الیکشن کے لئے 9 اپریل کا دن مقرر کیا ہے، جس دن ایسڑ منایا جائے گا۔

انہوں نے کہا کہ اقلیتییں برابر کے پاکستانی شہری ہیں، آج مسیحی برداری کے پہلے روزے پر نیک خواہشات اور قبولیت کی دعا کرتی ہوں۔

چیف آرگنائزر نے کہا کہ اقلیتوں نے پاکستان بنانے میں اہم کردار ادا کیا ہے، اقلیتوں نے قیام پاکستان میں قائد اعظم محمد علی جناح کا ساتھ دیا، اقلیتوں نے قیام پاکستان، دفاع پاکستان اور تعمیر پاکستان میں تاریخی کردار ادا کیا ہے۔

مسیحی برادری کے تحفظات درست ہیں

انکا کہنا ہے کہ مسیحی برادری کے تحفظات درست ہیں اور ان کے پاک دنوں پر سیاست کرنا اقلیتوں کے ساتھ زیادتی اور جمہوریت کی نفی ہے، غیرمسلم پاکستانی تعلیم، صحت اور خدمات عامہ میں شاندار کاوشیں کرتے آ رہے ہیں۔

مریم نواز نے کہا کہ اقلیتوں کے حقوق کا تحفظ ہمارے ایمان کا حصہ ہے، ايسٹر ہو، ہولی ہو، کرتار پور کوری ڈور ہو آپ مجھے جہاں بھی بلائيں گے ميں شامل ہونگی۔

مسلم لیگ کی چیف آرگنائزر نے مزید کہا کہ اقلیتوں کو سیاسی عمل میں مزید آگے لائیں گے، خواتین اور نوجوانوں کو مزید مواقع دیں گے۔

اس موقع پر اقلیتی ونگ کے عہدیداروں نے سینئر نائب صدر اور چیف آرگنائزر بننے پر مریم نواز کو مبارک دی اور کہا کہ آپ نے تنظیمی دوروں کا آغاز کر کے کارکنوں کو زبان دی ہے، کارکنوں کی سرپرستی کرنے اور آواز بننے پر آپ کا شکریہ ادا کرتے ہیں۔

اجلاس میں مسلم لیگ ن کے سینیئر رہنما پرویز رشید، طلال چوہدری، حنا پرویز بٹ، انوشہ رحمان، سینیٹر کامران مائیکل، رمیش سنگھ اروڑہ (سابق ایم پی اے)، سریش کمار(ممبر مینارٹی ونگ پشاور)، رمیش سنگھ (ممبر مینارٹی ونگ سندھ)، طارق گل (جنرل سیکرٹری مینارٹی ونگ کوئٹہ) اور خلیل طاہر سندھو(صدر مینارٹی ونگ پنجاب) نے شرکت کی۔