صدر آزاد جموں وکشمیر بیرسٹر سلطان محمود چوہدری نے کہا ہے کہ مشکل کی اس گھڑی میں ہماری ہمدردیاں اور مدد ہر طرح سے ترکی کے ساتھ ہے۔

تفصیلات کے مطابق صدر آزاد جموں وکشمیر بیرسٹر سلطان محمود چوہدری اسلام آباد میں ترکی کے سفارتخانے گئے جہاں ترکی کے پاکستان میں سفیر ڈاکٹر مہمت پیکاسی نے صدر آزاد جموں وکشمیر بیرسٹر سلطان محمود چوہدری کا ترکی سفارتخانے آمد پر استقبال کیا۔

اس موقع پر صدر آزاد جموں وکشمیر بیرسٹر سلطان محمود چوہدری نے مہمانوں کی کتاب میں ترکی میں آنے والے حالیہ زلزلے کے حوالے سے اپنے تعزیتی تاثرات درج کیے جبکہ اس موقع پر صدر آزاد جموں وکشمیر بیرسٹر سلطان محمود چوہدری نے ترکی کے سفیر ڈاکٹر مہمت پیکاسی سے ترکی میں آنے والے زلزلے میں شہید ہونے والے افراد کے لیے فاتحہ خوانی کی اور ترک حکومت اور عوام سے تعزیت اور ہمدردی کا اظہار بھی کیا۔

صدر آزاد جموں وکشمیر بیرسٹر سلطان محمود چوہدری نے کہا کہ مشکل کی اس گھڑی میں ہماری ہمدردیاں اور مدد ہر طرح سے ترکی حکومت اور عوام کے ساتھ ہیں کیونکہ 2005 کے آزاد کشمیر میں آنے والے زلزلے میں ہم خود بھی اسی طرح کی صورتحال سے گزر چکے ہیں اور اس وقت ترکی نے ہماری بڑی مدد کی تھی اور ہم بھی ترکی کی عوام کے لیے یہی جذبہ رکھتے ہیں اور آزاد کشمیر کےعوام دکھ کی اس گھڑی میں ترکی کے عوام کے ساتھ برابر کے شریک ہیں۔

بیرسٹر سلطان محمود چوہدری نے کہا کہ پاکستان کی امدادی ٹیمیں ترکی کے زلزلہ متاثرہ علاقوں میں امدادی کارروائیوں میں بڑھ چڑھ کر حصہ لے رہے ہیں اور اگرچہ اس زلزلہ سے ترکی کی اقتصادی رفتار متاثر ہوگی لیکن ہمیں قوی امید ہے کہ ترکی کی حکومت اور عوام اس مشکل صورتحال سے جلد نکلیں گے اور ایک نئے جذبے، ہمت و ولولے سے اس پر قابو پا لیں گے۔

صدر آزاد جموں وکشمیر بیرسٹر سلطان محمود چوہدری نے مزید کہا کہ آزاد کشمیر کے عوام ترکی کے عوام کی اس مشکل گھڑی میں ان کے ساتھ ساتھ ہیں اور ہم ان کی ہر طرح سے مدد کے لیے ہمہ وقت تیار ہیں۔