پاکستان انٹرنیشنل میری ٹائم ایکسپو اینڈ کانفرنس کی میڈیا بریف کا انعقاد کیا گیا ہے۔

ترجمان پاک بحریہ کے مطابق کمانڈر کراچی ریئر ایڈمرل میاں ذاکر اللہ جان نے کراچی ایکسپو سینٹر میں میڈیا کو بریفنگ دی۔

پاک بحریہ کے ترجمان نے بتایا کہ اس موقع پر ایڈیشنل سیکرٹری میری ٹائم افیئرز اسد رفیق چندنا بھی کمانڈر کراچی کے ہمراہ موجود تھے۔

ترجمان کا کہنا تھا کہ اپنی نوعیت کی یہ پہلی نمائش 12- 10 فروری تک کراچی ایکسپو سینٹر میں منعقد ہوگی تاہم نمائش میں 133 ملکی اور بین الاقوامی کمپنیاں اپنی مصنوعات پیش کریں گی۔

ترجمان پاک بحریہ کے مطابق نمائش کا مقصد پاکستان میں بلیو اکانومی  کے مواقع اجاگر کرنا اور ملکی میری ٹائم انڈسٹری کا فروغ ہے۔

ترجمان نے مزید کہا کہ نمائش کے انعقاد سے پاکستان میں سمندر سے وابستہ اقتصادی ترقی کے مزید مواقع پیدا ہوں گے۔

واضح رہے کہ چند ماہ قبل پاکستان انٹرنیشنل میری ٹائم ایکسپو اینڈ کانفرنس کے پریمیئر ایڈیشن کا سافٹ لانچ کا انعقاد کیا گیا تھا جس میں پاکستان کا پہلی بین الاقوامی میری ٹائم ایکسپو اینڈ کانفرنس 2023 کے انعقاد کا اعلان کردیا گیا تھا۔

ترجمان کا کہنا تھا کہ پاکستان انٹر نیشنل میری ٹائم ایکسپو اینڈ کانفرنس کا انعقاد 10-12فروری 2023 کو ایکسپو سینٹر کراچی میں ہو گا۔

پاک بحریہ کے ترجمان نے بتایا کہ وزیر دفاع نے PIMEC کے ذریعے پاکستان کے میری ٹائم سیکٹر کی صلاحیتوں کو اجاگر کرنے پر پاکستان بحریہ کی کاوشوں کو سراہا۔

یہ بھی پڑھیں: پاک بحریہ؛ مقامی سطح پر ڈیزائن کردہ پہلی گن بوٹس کی تعمیر کا آغاز

انہوں نے کہا کہ پاکستان کے میری ٹائم سیکٹر میں منافع بخش سرمایہ کاری اور تجارت کے بے پناہ مواقع موجود ہیں۔

وزیر دفاع نے مزید کہا کہ پاکستان ایک ذمہ دار ملک کے طور پر بین الاقوامی امن اور استحکام کے لئے اپنا کردار ادا کرتا رہے گا۔

اس موقع پر نیول چیف نے کہا کہ PIMEC-23 پاکستان کی معیشت کو تقویت دینے اور بین الاقوامی سطح پر ہمارے تشخص کو اجاگر کرنے میں مددگار ثابت ہوگی۔