لیگی رہنما اور رکنِ صوبائی اسمبلی رائے حیدر علی خان کی جانب سے پی ٹی آئی میں شمولیت کا باضابطہ اعلان کردیا گیا ہے۔

تفصیلات کے مطابق جڑانوالہ سے نون لیگ کے ٹکٹ پر منتخب رکنِ صوبائی اسمبلی رائے حیدر علی خان نے شریفوں سے ناطہ توڑ لیا  ہے اور ساتھیوں سمیت پاکستان تحریک انصاف میں شمولیت کا باضابطہ اعلان  کردیا گیا ہے۔

اس حوالے سے رائے حیدر علی خان کی چیئرمین تحریک انصاف عمران خان سے زمان پارک میں ملاقات ہوئی ہے۔

ملاقات کے دوران رائے حیدر علی خان نے چیئرمین تحریک انصاف کی قیادت، تحریک انصاف کے سیاسی ایجنڈے کی بھرپور تائید کا اعلان کیا ہے۔

اس موقع پر رائے حیدر علی خان کا کہنا تھا کہ چیئرمین تحریک انصاف فسطائیت کیخلاف جدوجہد کا استعارہ، قومی قیادت کی اہلیت و صلاحیت کا لوہا منوا چکے ہیں، ان کے خوف میں نام نہاد اہلِ سیاست پوری قوت سے دستور و جمہوریت کو کچلنے میں لگے ہوئے ہیں۔

انہوں نے کہا کہ عمران خان کی سیاست کو جواب ننگی جارحیت اور فسطائیت سے دیا جارہا ہے، عمران خان قوم کا انتخاب ہیں، نشانۂ انتقام بنا کر قوم کی توہین کی جارہی ہے۔

انہوں نے مزید کہا کہمشکلات سے نکل کر ترقی کی راہ پر چلتی معیشت کو ہفتوں، عشروں میں تباہی کے گھاٹ اتار دیا گیا ہے، عوام بدترین مہنگائی کے بوجھ تلے بِلک رہے، بےرحم گروہ نے ان پر زندگی تنگ کردی ہے۔

ان کا کہنا تھا کہحقیقی آزادی کے حصول کی جدوجہد میں عمران خان کے شانہ بشانہ لڑیں گے۔

انہوں نے مطالبہ کیا کہ ملک کو مزید تباہی کے گھاٹ اتارنے کی بجائے فوری عام انتخابات کے ذریعے عوام کو فیصلے کا حق دیا جائے،۔

خیال رہے کہ رائے حیدر علی خان پی پی 101 جڑانوالہ سے پنجاب اسمبلی کے رکن منتخب ہوئے تھے ۔