صدر مملکت ڈاکٹر عارف علوی نے ضیاء محی الدین کی وفات پر اپنے تعزیتی پیغام میں بتایا ہے کہ ان کی وفات میرے لیے ایک ذاتی نقصان ہے۔

تفصیلات کے مطابق صدر پاکستان ڈاکٹر عارف علوی نے ضیا ء محی الدین کی وفات پر تعزیت  کا اظہار کرتے ہوئے مرحوم کیلئے بلندی درجات کے لئے دعا کی اور فن کے شعبے میں خدمات کو خراج تحسین بھی پیش کی۔

انہوں نے اپنے پیغام میں فن، ادب، پرفارمنگ آرٹ، فنکاری ، ہدایتکاری کے شعبے میں مرحوم کی خدمات کو خراجِ عقیدت بھی پیش کیا  ہے۔

انہوں نے کہا ہے کہ فن ، اداکاری ، پیشکش ، ہدایتکاری کے شعبے میں ضیاء محی الدین ایک بلند پایہ شخصیت تھے، ان کی وفات میرے لیے ایک ذاتی نقصان ہے۔

انہوں نے مزید کہا کہ وہ نثر اور شاعری کے بہترین قاری تھے اور موسیقی کے ساتھ ٹھیکا لگا کر پڑھتے تھے، اللہ تعالیٰ فن کے شعبے اور ان کے اہل ِ خانہ کو یہ دکھ صبر کے ساتھ برداشت کرنے کی ہمت عطا فرمائے۔

خیال رہے کہ ممتاز اداکار، معروف ہدایت کار اور ٹی وی میزبان ضیا محی الدین 91 برس کی عمر میں انتقال کر گئے ہیں، ان کی نماز جنازہ آج کراچی میں ادا کی جائیگی۔

خاندانی ذرائع کے مطابق ضیا محی الدین کی نماز جنازہ ڈیفنس فیز 4 یثرب امام بارگاہ میں ادا کی جائے گی۔

خاندانی ذرائع نے بتایا ہے کہ ضیا محی الدین کو گزشتہ روز علالت کے باعث اسپتال منتقل کیا گیا تھا تاہم رات بھر انکی طبعیت تشویش ناک رہی وہ انتہائی نگہداشت میں زیر علاج تھے۔

ضیا محی الدین 20 جون 1931 کو فیصل آباد میں پیدا ہوئے تھے، انہوں نے گورنمنٹ کالج لاہور سے گریجویشن کیا۔

اپنی بہترین کمپیئرنگ، براڈکاسٹنگ، شاعری اور نثر کی تلاوت، اداکاری اور تھیٹر ڈائریکشن کے لیے جانا جاتا ہے، اس نے سینکڑوں طلبہ کی رہنمائی کی۔

انہیں 2012 میں فن کی بہترین خدمات پر ہلال امتیاز سے نوازا گیا۔