اسلام آباد: آزاد کشمیر کے وزیر اعظم تنویر الیاس کی جانب سے ترک کے زلزلہ متاثرین کے لیے ذاتی حیثیت میں ایک کروڑ روپے کی امداد کا اعلان کیا گیا ہے۔

اس حوالے سے وزیر اعظم آزاد کشمیر تنویر الیاس نے کہا ہے کہ ترک اور پاکستان کا بڑا مضبوط رشتہ ہے۔ آزاد کشمیر میں دوہزار پانچ کا زلزلہ ہولناک تھا، ترک صدر سمیت عوام نے کھل کر کشمیریوں کی مدد کی تھی۔

انہوں نے بتایا کہ آزاد کشمیر میں ایک سے پانچ گریڈ تک ملازمین ایک دن کی تنخواہ زلزلہ متاثرین کو دے رہے ہیں اور پانچ سے اوپر گریڈ کے ملازمین پانچ دن کی تنخواہ ترک زلزلہ متاثرین کو بھیج رہے ہیں۔

 آزاد کشمیر کے وزیر اعظم تنویر الیاس نے مزید کہا کہ دکھ کی گھڑی میں ترک عوام کو احساس دلانا ہے کہ ہم ان کے ساتھ کھڑے ہیں۔

ترکیہ کے زلزلہ متاثرین کی امداد کیلئے وزیراعظم ریلیف فنڈ قائم

اس سے قبل ترکیہ کے زلزلہ متاثرین کی امداد کیلئے وزیراعظم ریلیف فنڈ قائم کردیا گیا تھا۔

وزیر اعظم کی زیر صدارت وفاقی کابینہ کے اجلاس میں ’وزیر اعظم ریلیف فنڈ‘ قائم کرنے کا فیصلہ کیا گیا۔

اس فیصلے کی پیش نظر اراکان کابینہ کی جانب سے ایک ماہ کی تنخواہ ریلیف فنڈ میں دینے کا اعلان کیا گیا جبکہ وزیر اعظم نے بھی خیر حضرات سے امداد کی اپیل کی۔

یہ بھی پڑھیں: ترکیہ اور شام میں زلزلہ: ہلاکتوں کی تعداد 23 ہزار سے تجاوز کرگئی

اس موقع پر وزیر اعظم نے کابینہ اراکین کو دورہ ترکیہ سے متعلق آگاہ کیا اور بتایا کہ قیمتی انسانی جانوں کے ضیاع پر بے حد رنجیدہ ہیں۔

وزیر اعظم کا کہنا تھا کہ زلزلے کی تباہی سے نمٹنے میں پاکستان ترکیہ کی حکومت اور عوام کے ساتھ بھرپور تعاون کرے گا۔

عالمی ادارہ خوراک کی شام اور ترکیہ کے زلزلہ متاثرین کیلئے امداد کی اپیل

دوسری جانب عالمی ادارہ خوراک کی جانب سے دنیا بھر سے شام اور ترکیہ کے زلزلہ متاثرین کے لیے امداد کی اپیل کی گئی ہے۔

اقوام متحدہ کے ذیلی ادارے عالمی ادارہ خوراک کا کہنا تھا کہ ترکیہ  اور شام  کے زلزلہ متاثرین کے لیے راشن اور کھانا فراہمی کے لیے  77  ملین ڈالرز درکار ہیں۔

عالمی ادارہ خوراک کی رپورٹ کے مطابق شام میں زلزلے سے 2 لاکھ 84 ہزار افراد بےگھر ہوئے  ہیں جبکہ  ترکیہ میں ہولناک زلزلے کے باعث 5 لاکھ 90 ہزار لوگ بے گھر ہوئے ۔

عالمی ادارہ خوراک کی رپورٹ میں کہا گیا ہے کہ ترکیہ میں زلزلے کے باعث بے گھر افراد میں 45 ہزار مہاجرین بھی شامل  ہیں۔

یہ بھی پڑھیں: ترکیہ میں شدید نوعیت کا زلزلہ؛ سیاسی رہنماؤں کا اظہار افسوس

 رپورٹ کے مطابق ترکیہ اور شام میں سخت سردی ہے اور متاثرین کو گرم خوراک کی اشد ضرورت ہے۔ متاثرین کی امداد کے لیے جنگ زدہ یوکرین سے بھی ریسکیو ٹیمیں شام اور ترکیہ میں مصروف عمل ہیں۔

واضح رہے کہ پیر کی صبح ترکیہ اور شام میں آنے والے زلزلے سے اب تک 23 ہزار سے زائد ہلاکتیں ہوچکی ہیں جس میں بڑی تعداد میں اضافے کا خدشہ ظاہر کیا جا رہا ہے۔