رمضان المبارک میں گیس فراہمی کیلئے سوئی ناردرن کی جانب سے اہم اقدامات کا اعلان کیا گیا ہے۔

تفصیلات کے مطابق رمضان المبارک میں سوئی ناردرن سحر و افطار میں گیس کی بلاتعطل فراہمی یقینی بنائی گی، سحر و افطار میں گیس کے استعمال میں کئی گنا اضافہ ہو جاتا ہے، سحر و افطار میں گیس پریشر میں زیادہ سے زیادہ اضافہ کردیا جاتا ہے، گیس پریشر میں اضافے سے صارفین کو سحر و افطار میں گیس کی فراہمی یقینی بنائی جاتی ہے۔

سوئی ناردرن گیس کے ترجمان کے مطابق گھریلو صارفین کیلئے خصوصاً رات 2:30 بجے سے صبح 6 اور شام 4 بجے سے رات 9 بجے تک بلا تعطل اور پریشر کے ساتھ گیس کی فراہمی یقینی بنائی جائے گی تاہم ان اوقات کے علاوہ بھی گھریلو صارفین کو گیس کی فراہمی جاری رہے گی۔

سوئی ناردرن کی جانب سے جاری کردہ بیان میں بتایا گیا ہے کہ سحر و افطار کے اوقات میں گیس پریشر کے مسائل کو فوری حل کرنے کیلئے مانیٹرنگ ٹیمز تشکیل دیے جانے کے علاوہ شکایات کے فوری حل کیلئے کنٹرول روم بھی قائم کیا جائے گا۔

سوئی ناردرن نے صارفین سے سحر و افطار کے اوقات میں گیس کے ضیاع کو روکنے کی اپیل بھی کی ہے۔

سوئی ناردرن گیس کے ترجمان کے مطابق عوام کی خدمت کیلئے ایمرجنسی رسپانس ٹیمز تشکیل دی گئی ہیں،ایمرجنسی رسپانس ٹیمز 7/24 عوام کی خدمت کیلئے کوشاں رہیں گے، ٹیل اینڈ ایریاز میں گیس فراہمی کی ہر ممکن کوشش کی جائے گی، ہیلپ لائن 1199 پر گیس فراہمی اور پریشر سے متعلق شکایات پہنچائی جاسکتی ہیں اور گیس فراہمی سے متعلق شکایات سوئی ناردرن کے سوشل میڈیا اکاؤنٹس یا ویب سائٹ پر بھی درج کروائی جاسکتی ہیں۔