وزیر اعظم آزاد کشمیر سردار تنویر الیاس خان نے مسلم امہ سے گزارش کی ہے کہ وہ بھی کشمیر پر آواز اٹھائیں۔

تفصیلات کے مطابق وزیر اعظم آزاد کشمیر سردار تنویر الیاس خان نے وزیر اعلیٰ گلگت بلتستان و سابق وزیر اعظم آزاد کشمیر سردار عتیق احمد خان اور وزراء کے ہمراہ نیوز کانفرنس کرتے ہوئے کہا کہ پاکستان تحریک انصاف کے لیے آج تاریخی دن ہے، ہم نے بلدیاتی الیکشن کروانے کا بیڑا خود اٹھایا، اداروں نے بھی بھر پور تعاون کیا۔

انہوں نے کہا کہ ہمارا مؤقف تھا عوامی سطح تک اقتدار پہنچے جبکہ ایل او سی کے اس پار بھی پازیٹو میسج گیا۔

ان کا کہنا تھا کہ ریاست کے عوام کے ساتھ اخلاص ہے، 75 سالہ تاریخ میں ایسا پرامن الیکشن نہیں ہوا۔

ان کا یہ بھی کہنا تھا کہ غیر سرکاری نتائج کے مطابق بلدیاتی الیکشن پی ٹی آئی نے جیتا ہے، آزاد کشمیر الیکشن نے بلدیاتی الیکشن میں اچھی کارکردگی دکھائی، آزاد کشمیر پی ٹی آئی کارکنان مبارک باد کے مستحق ہیں جبکہ سب سیاسی جماعتوں کے جیتنے والے قابل عزت ہیں اور جیتنے والے سب جماعتوں کو برابر وسائل مہیا کریں گے، آزاد کشمیر اور جی بی کے درمیان شونٹر ٹنل سے مسافتیں کم ہونگی۔

تنویر الیاس نے کہا کہ سی ایم جی بی کا اچھا اقدام ہے، آزاد کشمیر حکومت نے چار وزراء کی کمیٹی بنا دی ہے، حکومت آزاد کشمیر بھی اس میں اپنا حصہ ڈال رہی ہے، شونٹر ٹنل کو ملکر پایہ تکمیل  پہنچائیں گے۔

انہوں نے کہا کہ جی کے ساتھ 23 مارچ سے بس سروس شروع کررہے ہیں، نیکٹا مظفرآباد میں اپنا آفس قائم کررہا ہے، چار روز میں اک بس جی بی کشمیر کی طرف جائے گی اور کشمیری جی بی عوام کو با آسان سفری سہولت میسر ہوگی۔

ان کا یہ بھی کہنا تھا کہ ایل او سی کے اس پار کشمیری بے سروسامانی کے عالم میں ہمارے لیے جنگ کررہے ہیں، 75 سال سے کشمیری قربانیاں دے رہے ہیں۔

وزیر اعظم آزاد کشمیر سردار تنویر الیاس خان نے مزید کہا کہ کشمیر کی مائیں بہنیں پوری امہ مسلمہ کی بہنیں ہیں، مسلم امہ سے بھی گزارش کرتے ہیں وہ بھی کشمیر پر آواز اٹھائیں اور عالمی دنیا انسانی حقوق کی خاطر کشمیریوں کو انصاف دلوائیں۔