کراچی پولیس آفس (کے پی او) پر حملے کا ماسٹر مائنڈ ساتھی سمیت ہلاک ہو گیا۔

ایس ایس پی سی ٹی ڈی طارق نواز کے مطابق کاؤنٹر ٹیررازم ڈیپارٹمنٹ (سی ٹی ڈی) نے منگھو پیر کے علاقے مائی گاڑی مزار کے قریب دہشت گردوں کی موجودگی کی خفیہ اطلاع پر چھاپہ مار کارروائی کی ۔

طارق نواز نے بتایا کہ پولیس پارٹی کو دیکھتے ہیں دہشت گردوں نے خودکار ہتھیاروں سے فائرنگ شروع کردی ۔

ایس ایس پی سی ٹی ڈی کا کہنا تھا کہ پولیس نے جوابی کارروائی کرتے ہوئے دو دہشت گردوں کو مار گرایا جبکہ دو دہشت گرد گرفتار کر لئے ۔

یہ بھی پڑھیں: کراچی پولیس آفس حملہ؛ پولیس اور رینجرز اہلکار سمیت 4 شہید، تمام دہشت گرد جہنم واصل

 سی ٹی ڈی انچارج راجہ عمر خطاب نے بتایا کہ ہلاک دہشت گردوں کی شناخت اریاد اللہ اور عبدالوحید کے ناموں سے کی گئی ہے، ہلاک دہشت گرد اریاد اللہ کراچی پولیس آفس پر ہونے والے حملے کا ماسٹر مائنڈ تھا ۔

راجہ عمر خطاب نے کہا کہ ہلاک اور گرفتار دہشت گردوں کا تعلق کالعدم ٹی ٹی پی سے ہے ۔ دہشت گردوں کے قبضے سے خودکش جیکٹ، پانچ چھوٹے بڑے ہتھیار اور دو موٹر سائیکلیں بھی برآمد کی گئی ہیں جبکہ خودکش جیکٹ کو بم ڈسپوزل اسکواڈ نے ناکارہ بنا دیا ۔

سی ٹی ڈی انچارج نے مزید بتایا کہ گرفتار دہشت گردوں کو مزید تفتیش کے لئے نامعلوم مقام پر منتقل کردیا گیا ہے جبکہ دوران تفتیش اہم انکشافات کی توقع ہے ۔

واضح رہے کہ گزشتہ ماہ کراچی پولیس آفس (کے پی او) پر دہشت گرد حملے میں پولیس اور رینجرز اہلکار سمیت 4 افراد شہید ہوئے تھے جبکہ حملہ کرنے والے تینوں دہشت گرد مارے گئے تھے ۔