گورنر سندھ کامران خان ٹیسوری نے کہا ہے کہ سب سے بڑا چیلنج سیلاب متاثرین کی دوبارہ آبادکاری کا ہے۔

تفصیلات کے مطابق گورنر سندھ کامران خان ٹیسوری نے پی ایم ایس پروبیشنر آف سول سروس پروگرام کے 40 شرکاء سے خطاب کرتے ہوئے کہا کہ آپ کو عوام کی خدمت کا موقع ملا ہے، اسے پوری لگن، محنت اور دیانت سے سرانجام دیں، آپ اپنی اپنی حیثیت میں صاحب اختیار ہوں گے اور اللہ تعالیٰ ہر صاحب اختیار سے حساب لے گا، اختیار کا درست استعمال مسائل حل کرنے کا باعث بنے گا۔

انہوں نے کہا کہ صوبہ بے تحاشہ مسائل کا شکار ہے، بنیادی سہولیات کی عدم دستیابی سے لے کر روزمرہ کے مسائل حل تک عوام ہر جگہ پریشان ہیں، مہنگائی نے عوام کی کمر توڑ کر رکھ دی ہے، مہنگائی کی وجہ ایک بڑی وجہ ذخیرہ اندوزی اور ناجائز منافع خوری ہے۔

ان کا کہنا تھا کہ ایک اچھا افسر اپنے ماتحت افراد سے زیادہ بہتر کام لے سکتا ہے، اپنی ٹیم کی تیاری آپ کا سب سے بڑا امتحان ہوتا ہے، عوام کی خدمت کا جذبہ سارے مسائل پر غالب آجایا کرتا ہے، اس نیک مشن میں رکاوٹیں بھی اس کے سامنے ریت کی دیوار کی مانند ہوا کرتی ہیں۔

یہ بھی پڑھیں؛ کراچی کی ترقی دراصل پورے ملک کی ترقی ہے، کامران خان ٹیسوری

ان کا یہ بھی کہنا تھا کہ اس وقت صوبہ میں سیلاب سے بہت زیادہ تباہی مچی ہوئی ہے اور سب سے بڑا چیلنج متاثرین کی دوبارہ آباد کاری کا ہے۔

گورنر سندھ کامران خان ٹیسوری نے مزید کہا کہ عوام کو اپنے اعلیٰ تعلیم یافتہ افسران سے بڑی توقعات ہوتی ہیں اور مجھے امید ہے کہ آپ سب عوام کے لئے مسیحا کا روپ ضرور دھاریں گے۔

اس موقع پر سیکریٹری ٹریننگ اینڈ مانیٹرنگ ایس اینڈ جی ڈی رفیق مصطفی شیخ نے گورنرسندھ کو بریفنگ بھی دی۔