کراچی: محکمہ انسداد دہشت گردی (سی ٹی ڈی) کی جانب سے کالعدم تنظیم سے تعلق رکھنے والے 11 دہشت گرد کو گرفتار کر لیا گیا ہے۔

ترجمان سی ٹی ڈی کے مطابق سی ٹی ڈی سندھ نے کالعدم جماعتوں کے خلاف گھیرا تنگ کردیا ہے، شہر کے مختلف علاقوں میں انٹیلی جنس بنیادوں پر کارروائیاں کی گئیں جس کے نتیجے میں مجموعی طور پر کالعدم تنظیم سے تعلق رکھنے والے 11 ملزمان کو حراست میں لیا گیا۔

سی ٹی ڈی حکام کا کہنا ہے کہ حراست میں لیے گئے تمام افراد پہلے بھی بڑے دہشت گردی کے کیسز میں گرفتار ہوئے تھے۔

حکام کے مطابق گرفتار ملزمان مختلف اوقات میں ضمانت پر جیل سے رہا ہوچکے تھے، ملزمان کو دوبارہ حراست میں لے کر تفتیش کی جا رہی ہے۔

مزید پڑھیں: صوابی میں سی ٹی ڈی آپریشن، حملہ آوروں نے خود کو دھماکے سے اُڑالیا

حکام نے بتایا کہ زیر حراست ملزمان کراچی میں دہشت گردی میں ملوث رہے ہیں، زیر حراست ملزمان سے حالیہ دہشت گردی کے حوالے سے پوچھ گچھ جاری ہے۔

سی ٹی ڈی کا مزید کہنا ہے کہ مشتبہ پائے جانے والے کالعدم جماعت کے افراد کے نام فورتھ شیڈول میں شامل کیے جائیں گے تاکہ انکی مانیٹرنگ کی جائے۔

واضح رہے کہ چند روز قبل بھی کراچی کے علاقے کورنگی انڈسٹریل ایریا میں سی ٹی ڈی کی چھاپہ مار کارروائی کے دوران داعش کے اہم کمانڈر عبدالمالک کو گرفتار کرلیا گیا تھا۔

ترجمان سی ٹی ڈی کا کہنا تھا کہ  ملزم  نے دوران تفتیش اہم انکشافات کیے۔

 مزید پڑھیں: دہشت گردی کے خدشات، سی ٹی ڈی نے کومبنگ آپریشن تیز کردیے

ترجمان سی ٹی ڈی نے بتایا تھا کہ ملزم سال 2011 سے داعش عبدالمنان گروپ سے وابستہ ہے۔ ملزم افغانی ہے اور کافی عرصے سے کراچی میں مقیم ہے۔

ترجمان سی ٹی ڈی نے مزید بتایا کہ ملزم رمضان کے مہینے میں چندہ اکٹھا کر کے افغانستان  میں داعش کو بھیجتا تھا۔

ترجمان سی ٹی ڈی کے مطابق ملزم کے موبائل فون سے اہم معلومات ملی ہیں جن کا کا فرانزک معائینہ کروایا جائے گا۔ ملزم سے مزید تفتیش جاری ہے جس میں اہم انکشافات متوقع ہیں۔