پاکستان تحریک انصاف کے رہنما حماد اظہر نے کہا ہے کہ ریلی کے خوف سے امپورٹڈ حکومت کی کانپیں ٹانگ رہی ہیں۔

پی ٹی آئی رہنما حماد اظہر نے لاہور میں میڈیا سے گفتگو کرتے ہوئے کہا کہ زمان پارک کے اطراف کی تمام سڑکیں بند کردی گئی ہیں، کارکن پر امن رہیں رانا ثناء اللہ خون چاہتا ہے۔

انہوں نے کہا کہ لاہور آنے کے تمام راستے بند کردیے گئے ہیں، ریلی کے خوف سے ان کی کانپیں ٹانگ رہی ہیں، عمران خان کا خوف ان کے ہوش و حواس پر سوار ہے۔

حماد اظہر نے کہا کہ آج کہہ رہے ہیں شہر میں7 دن کے لیے ریلیاں، جلوس نہیں ہونگے، ثابت ہوتا ہے نگراں حکومت غیر جانبدار نہیں، موجودہ نگراں حکومت کہیں اور سے ہدایات لے رہی ہے۔

پی ٹی آئی رہنما کا کہنا ہے کہ پی ٹی آئی آئین وقانون کے ساتھ چلنے والی جماعت ہے۔ عمران خان پر 77 جعلی مقدمے بن چکے ہیں۔

حماد اظہر نے مزید کہا کہ ہماری ریلی میں عوام کی بڑی تعداد شریک ہوگی، تحریکیں ایسے ہتھکنڈوں سے نہیں روکی جاسکتیں۔

واضح رہے کہ محکمہ داخلہ پنجاب کی جانب سے لاہور میں جلسے، جلوسوں، احتجاج اور ریلیوں پر پابندی عائد کر دی گئی ہے۔

اس حوالے سے نوٹیفکیشن بھی جاری کردیا گیا ہے جس میں واضح کیا گیا ہے کہ لاہور میں احتجاج ، دھرنے اور مظاہروں پر بھی پابندی عائد کر دی گئی ہے۔

ںوٹیفکیشن کے مطابق پابندی کا نفاذ آج سے شروع ہو گا جو کہ آئندہ 7 روز تک جاری رہے گی۔

محکمہ داخلہ پنجاب کی جانب سے پابندی لاہور میں ٹریفک اور سیکیورٹی کی خراب صورتحال کے پیش نظر لگائی گئی ہے۔

خیال رہے کہ  پاکستان تحریک انصاف کے چیئرمین عمران خان آج لاہور سے ریلی کی صورت میں الیکشن کمپین کا آغاز کر رہے ہیں ریلی میں کارکنان کی بڑی تعداد ساتھ میں موجود ہو گی اور مختلف مقامات پر استقبالیہ کیمپ بھی لگائے جائیں گے۔

ریلی زمان پارک سے شروع ہوکر کنال روڈ، اچھرہ، مزنگ، ایم-اے-او کالج، ناصر باغ سے ہوتے ہوئے داتا دربار تک جائے گی۔