پاک بحریہ کا دوسرا بحری جہاز ترکیہ اور شام کیلئے امدادی سامان لے کر روانہ  ہوگیا ہے۔

ترجمان کے مطابق پوری پاکستانی قوم کے ہمراہ پاک بحریہ بھی ترکیہ اور شام کے متاثرین بہن، بھائیوں کی مدد کو پیش پیش ہے جس کی پیش نظر پاکستان نیوی کا دوسرا بحری جہاز پی این ایس معاون امدادی سامان لے کر ترکیہ اور شام روانہ کردیا گیا ہے۔

ترجمان نے بتایا ہے کہ جہاز پی این ایس معاون پر 500 ٹن سے زیادہ امدادی سامان لے کر جا رہا ہے جس میں سردی سے بچاؤ کے خیمے، کمبل، گرم کپڑے، جنریٹر، دوائیں، خشک راشن پیکس شامل ہے۔

ترجمان کا کہنا تھا کہ امدادی سامان کی ترسیل بالترتیب ترکی اور شام کی مرسین اور لطاکیہ بندرگاہوں پر ہو گی  جو کہ 23 مارچ کو ترکیہ اور 30 مارچ کو شام پہنچے گا۔

یہ بھی پڑھیں: ترکیہ اور شام کے زلزلہ متاثرین کی مسلسل امداد کیلئے پاک بحریہ مصروف عمل

ترجمان کے مطابق جہاز کو وفاقی وزیر بحری امور سید فیصل علی سبزواری، چیئرمین این ڈی ایم اے نے رخصت کیا، اس موقع پر کراچی میں ترکیہ کے قونصل جنرل، کمانڈر پاکستان فلیٹ ریئر ایڈمرل فیصل عباسی بھی موجود تھے ۔

ترجمان نے بتایا کہوفاقی وزیر کا برادر ممالک ترکیہ، شام کے زلزلہ متاثرین کی مدد کے لیے پاکستانی عزم کا اعادہ  کیا۔

قبل ازیں پاک بحریہ کا جہاز پی این ایس نصر بھی امدادی سامان لے کر 28 فروری کو ترکیہ، شام روانہ ہوا تھا۔