وزیر اعظم کے مشیر برائے اُمور کشمیر و گلگت بلتستان قمر زمان کائرہ نے کہا ہے کہ آزادکشمیر کے معاشی مسائل حل کرنے کیلئے اپنا بھرپور کردار ادا کریں گے۔

تفصیلات کے مطابق وزیر اعظم کے مشیر برائے اُمور کشمیر و گلگت بلتستان قمر زمان کائرہ سے آزاد کشمیر کے وزیراعظم سردار تنویر الیاس نے اسلام آباد میں ملاقات کی جس میں آزاد کشمیر میں جاری ترقیاتی منصوبوں اور معاشی مسائل  کے حوالے سے تفصیلی بات چیت کی گئی۔

اس موقع پر مشیر اُمور کشمیر و گلگت بلتستان قمر زمان کائرہ نے کہا کہ آزاد کشمیر کا خطہ انتہائی اہمیت کا حامل ہے اور وزیر اعظم پاکستان نے آزاد کشمیر کے مسائل کے حل کے حوالے سے خصوصی ہدایات جاری کررکھیں ہیں۔

انہوں نے کہا کہ اس اہمیت کا اندازہ اس امر سے لگایا جا سکتا ہے کہ موجودہ مالیاتی سال میں تمام صوبوں کے بجٹ میں کٹ لگایا گیا لیکن آزاد کشمیر کی اہمیت کو جانتے ہوئے اسکے بجٹ کو برقرار رکھا گیا۔

قمر زمان کائرہ نے کہا کہ وہ تمام تر سیاسی وابستگیوں سے بالا تر ہو کر آزادکشمیر کے عوام کے مسائل کے حل کے لیے اپنا مثبت کردار جاری رکھیں گے۔

مشیر اُمور کشمیر نے کہا کہ آزادکشمیر میں ٹیکس اصلاحات کے سلسلے میں ٹریک وٹر یس سسٹم کے نفاذ کے لیے تمام تر تکنیکی معاونت فراہم کرنے کے لیے تیار ہے تاکہ آزادکشمیر میں ٹیکس کولیکشن کے نظام کو بہتر بنایا جاسکے۔

ملاقات میں آزادکشمیر کے وزیراعظم سردار تنویر الیاس نے تنخواہوں میں اضافے کے امپیکٹ اور مہنگائی کے پیش نظر مختلف منصوبوں کے ریٹس  بڑھانے  کے حوالے سے بجٹ ایشوپر آزادکشمیر کے تحفظات سے آگاہ کیا اور مطالبہ کیا کہ اس ضمن میں حکومت پاکستان تعاون کرے۔

 اس کے علاوہ وزیر اعظم آزادکشمیر نے پی ٹی اے اور یو ایس ایف آزاد کشمیر کے شیئر کے حوالے سے تجاویز پیش کیں اور کہا کہ اس شیئر کی ادائیگی کے سلسلے  میں وزارت اُمور کشمیر اپنا کردار ادا کرے۔

 اس موقع پر مشیر اُمور کشمیر قمر زمان کائرہ نے کہا کہ ملک میں معاشی صورتحال کے باعث پی ایس دی پی فنڈز میں کمی کر دی گئی ہے لیکن اس کے باوجودد آزادکشمیر کی خصوصی اہمیت کو جانچتے ہوئے اُن کی وزارت آزادکشمیر کے معاشی مسائل کے حل کے حوالے سے اپنا بھرپور کردار ادا کرے گی۔

مشیر اُمور کشمیر قمر زمان کائرہ اس موقع پر اس امر پر زور دیا کہ مثبت نتائج حاصل کرنے کے لیے ضروری ہے کہ وزارت اُمور کشمیر اور آزادکشمیر حکومت میں تعاون اور رابطوں کو اورمضبوط کیا جائے۔

ملاقات میں وزیر اعظم پاکستان کے معاون خصوصی طارق محمود پاشا، سیکرٹری اُمور کشمیر و گلگت بلتستان، چیف سیکرٹری آزادکشمیر کے علاوہ دیگر اعلیٰ افسران نے بھی شرکت کی۔