گورنر سندھ کامران خان ٹیسوری نے کہا ہے کہ پاکستان میں تمام رنگ و نسل کے شہریوں کو یکساں حقوق حاصل ہیں۔

تفصیلات کے مطابق گورنر سندھ کامران خان ٹیسوری نے صوبائی کابینہ کے اراکین کے ہمراہ مزار قائد پر حاضری دی۔

گورنر سندھ نے کہا کہ آزادی ایک نعمت ہے اور ہمیں اللہ تعالیٰ کا شکر ادا کرنا چاہیے کہ اس نے ہمیں ایک آزاد ریاست سے نوازا ہے، یہاں تمام مذاہب کے پیروکاروں کو اپنی مذہبی رسومات کی ادائیگی کی مکمل آزادی ہے۔

یہ بھی پڑھیں؛ پاک فضائیہ کے شاہینوں کا یوم پاکستان پر قوم کو سلام

کامران ٹیسوری نے کہا کہ وطن عزیز میں تمام رنگ و نسل کے شہریوں کو یکساں حقوق حاصل ہیں، 75 برسوں کے تجربات کی روشنی میں ملک کی تعمیر و ترقی کے لیے یکجا ہو کر کام کرنا ہو گا، ہمیں بانیان پاکستان کے افکار کے مطابق اپنے تمام اختلافات بھلا کر ایک متحد قوم کی حیثیت سے انتھک محنت کرنا ہو گی۔

گورنر سندھ نے کہا کہ ہمیں قومی مقاصد کے حصول کے لیے اتحاد، ہم آہنگی اور مکمل یکسوئی کے ساتھ آگے بڑھنا ہو گا، ہمیں یوم پاکستان کے موقع پر یہ ثابت کرنا ہو گا کہ ہم منظم، متحد اور مہذب قوم ہیں۔

ان کا کہنا تھا کہ قائد اعظم کو اللہ جنت میں جگہ عطا کرے، قائد اعظم نے ہی ہمیں سوچ دی ہم آگے بڑھیں۔

انہوں نے مزید کہا کہ 75 سال گزرنے کے بعد آج اس عظم کو لے کر نکلے ہمیں پاکستان کو آگے لے کر چلنا ہے، ہم ضرور ترقی کریں گے۔

ضرور پڑھیں؛ یوم پاکستان، مزار اقبال پر گارڈز کی تبدیلی کی پروقار تقریب