عمرہ زائرین کیلئے بڑی خوشخبری آگئی ہے۔

حال ہی میں المسجد الحرام اورمسجد نبوی کےامورکی جنرل پریزیڈنسی نے ماہ مقدس رمضان المبارک کے دوران دونوں مقدس ترین مساجد کے زائرین کے لیے 40 ملین لیٹر زم زم کا پانی تقسیم کرنے کے لیے 20 ہزار مقامات کو مختص کردیا ہے۔

اس انتظام میں بین الاقوامی معیارکو مد نظر رکھتے ہوئے پاکیزگی اورصفائی کو یقینی بنانے کے لیےجدید ترین میکانزم اورٹیکنالوجیز کا استعمال کیا گیا ہے۔

المسجد الحرام میں زم زم تقسیم کرنے کے شعبہ کے ڈائریکٹر عبد الرحمن الزھرانی نے بتایا ہے کہ انتظامیہ نے بابرکت پانی کے 30 ہزار کنٹینر تیار کر کے پوری مسجد میں تقسیم کر دیے ہیں، اندرونی اوربیرونی حصوں میں ماربل کی پانی کی سبلیں الگ سے موجود ہیں۔

عبد الرحمن الزھرانی نے کہا ہے کہ ادارے  نے روبوٹ ٹیکنالوجی کے ذریعے زم زم کا پانی فراہم کر کے ایک بڑی کامیابی حاصل کرلی ہے، پانی پلانے کے لیے 80 سمارٹ گاڑیوں کا انتظام کیا گیا ہے۔

انہوں نے کہا کہ مسجد نبوی ﷺ میں رمضان المبارک میں لوگوں کی بڑی تعداد کا احاطہ کرنے کے لیے زم زم کے پانی کی بوتلیں فراہم کرنے کے لیے مختلف اقدامات کئے گئے ہیں۔

 عبد الرحمن الزھرانی نے کہا ہے کہ اس منصوبے میں جنازے کے مقامات ،مکبر کی جگہ، معذور افراد کے مقامات، مردوخواتین کے ہالوں کا احاطہ کرتے ہوئے مقدس پانی بھرنے کے 250 ذخیرے فراہم کیے جائیں گے۔

الزھرانی کا کہنا ہے کہ انتظامیہ نے 24 گھنٹے کے دوران تمام مقامات پرفالو اپ کو مضبوط بنانے کی کوشش بھی کی ہے تاکہ چلنے کے مقامات اوردیگر جگہوں پر تمام ضروریات کی حفاظت اور کوریج کو یقینی بنایا جا سکے۔