الیکشن کمیشن اور گورنر خیبرپختونخوا حاجی غلام علی کے درمیان انتخابات کی تاریخ کے حوالے سے ڈیڈ لاک برقرار ہے۔

ذرائع کے مطابق خیبرپختونخوا میں انتخابات کے حوالے سے گورنر ہاؤس میں منعقدہ مشاورتی اجلاس بے نتیجہ ختم ہوگیا۔ اجلاس میں انتخابات کی تاریخ نہ دی جاسکی۔

انتخابات کی تاریخ پر ڈیڈ لاک برقرار#BOLNews #ElectionCommission pic.twitter.com/ud3lj1d2BJ

— BOL Network (@BOLNETWORK) March 8, 2023

ذرائع کے مطابق اجلاس میں الیکشن کمیشن ٹیم نے گورنر خیبرپختونخوا کو بریفنگ دی  اور الیکشن پر ہونے والے اخراجات اور دیگر معاملات کے بارے میں گورنر کو آگاہ کیا۔

ذرائع کا کہنا تھا کہ اجلاس میں گورنر خیبرپختونخوا نے صوبے میں پر امن انتخابات کے انعقاد پر زور دیا۔

ذرائع نے بتایا کہ الیکشن کمیشن حکام نے اپنے موقف میں کہا کہ سپریم کورٹ کے حکم کے تحت مشاورت کا دائرہ کار صرف انتخابی تاریخ پر ہوگا۔

اس موقع پر الیکشن کمیشن حکام نے گورنر خیبرپختونخوا کو انتخابی تاریخ تک محدود رہنے کا مشورہ دیا۔

ذرائع کے مطابق سپریم کورٹ کے حکم پر 90 دنوں کے اندر خیبرپختونخوا میں الیکشن کرانے کیلئے تاریخ مقرر کرنے پر مشاورت جاری ہے۔

ذرائع نے مزید بتایا کہ دو گھنٹے طویل مشاورتی اجلاس میں عام انتخابات کیلئے تاریخ کے حوالے سے مشاورت آخری مراحل میں داخل ہوگئی تاہم اگلا اجلاس اگلے ہفتہ دوبارہ ہوگا، گورنر خیبرپختونخوا آئندہ ہفتے الیکشن کمیشن اسلام آباد میں حتمی مشاورت کیلئے جائیں گے۔

واضح رہے کہ مشاورتی اجلاس میں الیکشن کمیشن کی نامزد کردہ ٹیم میں سیکریٹری الیکشن کمیشن عمرحمیدخان، اسپیشل سیکریٹری الیکشن کمیشن ظفراقبال حسین اور ڈائریکٹرجنرل لاء ارشد خان شامل تھے۔

اس کے علاوہ اجلاس میں گورنرسیکریٹریٹ سے پرنسپل سیکرٹری برائے گورنر محمودحسن، ایڈیشنل سیکریٹری برائے گورنر سیف الاسلام بھی شریک ہوئے۔

اعلامیہ جاری

الیکشن کمیشن کی جانب سے مشاورتی اجلاس کے اعلامیے کے مطابق الیکشن کمیشن کی ٹیم نے گورنر خیبرپختونخوا سے ملاقات کی، جس کا مقصد خیبرپختونخوا میں الیکشن کی تاریخ مقرر کرنا تھا۔

اعلامیے میں بتایا گیا کہ الیکشن کمیشن کی جانب سے ٹیم کو مشاورت کے حوالے سے مکمل اختیارات دیے گئے، الیکشن کمیشن نے آئین اور قانون کے مطابق گورنر خیبرپختونخوا کو بریفنگ دی۔ بریفنگ کا مقصد 90 روز یا کم سے کم وقت میں انتخابات کروانا تھا۔

الیکشن کمیشن نے اعلامیے میں بتایا کہ گورنر نے کہا کہ وہ آئندہ ہفتے الیکشن کمیشن حکام کے ساتھ حتمی مشاورت کریں گے، سیکریٹری الیکشن کمیشن نے واضح کیا کہ وہ صرف الیکشن کی تاریخ پر مشاورت کیلئے آئے ہیں۔

اعلامیے میں مزید کہا گیا کہ انتخابات کی تیاریوں کے حوالے سے الیکشن کمیشن حکومت اور قانون نافذ کرنے والے اداروں کے ساتھ رابطے میں ہے، الیکشن کمیشن جلد متعلقہ اداروں سے ملاقات کر کے امن و امان اور الیکشن انتظامات کو حتمی شکل دے گا۔