کوئٹہ پریس کلب میں پیس فلیکس کی جانب سے مختلف جامعات کے جرنلزم طلباء کیلئے تربیتی ورکشاپ کا انعقاد کیا گیا ہے۔

تفصیلات کے مطابق کوئٹہ پریس کلب میں مختلف جامعات سے تعلق رکھنے والے میڈیا ڈریپاٹمنٹ کے طلباء کیلئے پیس فلیکس کی جانب سے 1 روزہ ڈیجیٹل جرنلزم اور ایکٹیوزم پر تربیتی ورکشاپ کا انعقاد کیا گیا جس کے مہمان خصوصی کوئٹہ پریس کلب کے صدر عبدالخالق رند تھے۔

ورکشاپ میں ڈیجیٹل ایکٹیوزم پیس ڈیلویپمنٹ صحافتی اخلاقیات آن لائن صحافت اور نفسیاتی مسائل کے حوالے سے آگاہی فراہم کی گئی۔

صدر کوئٹہ پریس کلب عبدالخالق رند نے پروگرام کے دوران اظہار خیال کرتے ہوئے شرکاء کو بتایا کہ ریڈیو اخبار اور الیکٹرانک میڈیا کے بعد اب ڈیجیٹل میڈیا کا دور ہے وقت کے ساتھ صحافت بھی ترقی کے مراحل طے کررہی ہے جس کے لیے فیلڈ میں کام کرنیوالے اور نئے آنیوالے صحافیوں کو تیاری کرنا ہوگی۔

 ورکشاپ کے دوران جامعہ بلوچستان کے میڈیا اسٹیڈیز ڈریپاٹمنٹ کے لیکچرار عمران خان نے صحافتی اخلاقیات اور میڈیا قوانین سے متعلق آگاہی فراہم کرتے ہوئے بتایا کہ صحافتی اخلاقیات کو نظر انداز نہیں کیا جاسکتا بطور صحافی ذمہ داری عائد ہوتی ہے کہ بغیر کسی جانبداری کے خبر کو رپورٹ کیا جائے۔

 میڈیا ٹرینر منظور احمد نے شرکاء کو ڈیجیٹل ایکٹیوزم کے حوالے سے آگاہ کرتے ہوئے کہا کہ دور جدید میں سوشل میڈیا کسی بھی مسئلے پر آواز اٹھانے کا بہترین پلیٹ فارم ہے نوجوان صحافی دور جدید کے میڈیا کو استعمال میں لاکر معاشرتی مسائل کے حل میں کردار ادا کرسکتے ہیں۔

 میڈیا ٹرینر عاصم احمد نے ڈیجیٹل میڈیا سے متعلق بتایا کہ طلباء اور نوجوان صحافی آن لائن ٹولز کو استمال کرکے جدید تقاضوں کے مطابق رپورٹنگ کر سکتے ہیں۔

 عاصم احمد نے شرکاء کو جدید ٹولز کے  استعمال کا طریقہ کار بھی بتایا اور شرکاء سے سائیکلوجسٹ سعدیہ نے اظہار خیال کرتے ہوئے کہا کہ ہیش ٹیگ اور ذاتی نوعیت کے الزامات کی وجہ سے نفسیاتی مسائل کا سامنا ہوسکتا ہے جس کے حل کیلئے ناصرف آگاہی کے ساتھ ذمہ داری کی بھی ضرورت ہے ڈیجیٹل دور میں نفسیاتی مسائل بھی بڑھ رہے ہیں جن کو سمجھنا ضرور ہے۔

  پیس فلیکس کی جانب سے ورکشاپ کے منتظم محمد غضنفر نے شرکا کا شکریہ ادا کرتے ہوئے کہا کہ اس سیشن کا مقصد زیر تعلیم اور پاس آؤٹ ہونیوالے طلباء کو امن، اخلاقیات اور سوشل میڈیا کے استعمال سے متعلق آگاہی فراہم کرنا تھا۔

ورکشاپ کے اختتام پر میڈیا ڈریپاٹمنٹ کے طلباء زینب، رومیسا سکینہ لائبہ شاہ فیصل لیاقت رفیق و دیگر نے کہا کہ اس طرح کے تربیتی پروگرام مزید ہونے چاہیئں تاکہ نئے آنیوالے چیلنجوں سے طلباء آگاہی کے ساتھ تیار بھی ہوسکیں۔

 اس موقع پر مہمان خصوصی اور ٹرینرز کو شیلڈ جبکہ شرکاء کو سرٹیفیکٹس سے نوازا گیا۔