بولان میں بلوچستان کانسٹیبلری کی گاڑی کے قریب دھماکے سے 9 اہلکار شہید ہوگئے۔

پولیس ذرائع کے مطابق بلوچستان کے ضلع بولان میں کمبڑی پل کے قریب بلوچستان کانسٹیبلری کی گاڑی کے نزدیک خود کش دھماکا ہوا جس کے نتیجے میں 9 اہلکار شہید اور 8 زخمی ہوگئے۔

سبی میں بلوچستان کانسٹیبلری کی گاڑی پر خودکش حملہ
خودکش حملے کے نتیجے میں 2 اہلکار شہید جب کہ 15 افراد زخمی ہوگئے #BOLNews #Balochistan pic.twitter.com/aTaZbSJ3Ys

Advertisement

— BOL Network (@BOLNETWORK) March 6, 2023

ریسکیو ذرائع نے بتایا کہ ذرائع کا کہنا ہے کہ دھماکے میں زخمی ہونے والے افراد کو اسپتال منتقل کیا جارہا ہے جبکہ دھماکے میں راہگیر بھی زخمی ہوئے ہیں۔

ریسکیو ذرائع نے مزید بتایا کہ دھماکے سے بلوچستان کانسٹیبلری کی گاڑی بری طرح متاثر ہوگئی ہے۔

یہ بھی پڑھیں: ملک میں دہشت گردی کے خاتمے کیلئے سیکیورٹی فورسز کے آپریشنز

پولیس نے بتایا کہ بی سی اہلکار سبی میلہ ڈیوٹی اختتام کے بعد کوئٹہ جارہے تھے تاہم ابتدائی اطلاع کے مطابق دھماکا خود کش بمبار نے کیا۔

اس حوالے سے ایم ایس ڈاکٹر رفیق مستوئی نے بتایا کہ دھماکے میں شہید ہونے والے 9 جوانوں کی لاشیں سول اسپتال سبی لائی گئی ہیں جبکہ 8 زخمیوں کو بھی اسپتال  منتقل کردیا گیا ہے جن میں 4 کی حالت نازک بتائی جارہی ہے۔

اسپتالوں میں ایمرجنسی نافذ

بولان دھماکے کے بعد حکومت بلوچستان کا ہیلی کاپٹر بولان روانہ کر دیا گیا ہے۔ ہیلی کاپٹر کے ذریعے بلوچستان کانسٹیبلری کے زخمیوں کو کوئٹہ منتقل کیا جائے گا۔

دھماکے کے بعد صوبائی دارالحکومت کے اسپتالوں میں ایمرجنسی نافذ کردی گئی ہے اور ڈاکٹروں سمیت تمام عملے کو حاضر رہنے کی ہدایت کی گئی ہے۔

وزیراعلیٰ بلوچستان کی مذمت

وزیراعلیٰ بلوچستان عبدالقدوس بزنجو نے سبی کے قریب بلوچستان کانسٹیبلری کی گاڑی کے قریب بم دھماکے کی مذمت کرتے ہوئے کہا کہ دہشت گرد عناصر بذدلانہ کارروائیوں سے مزموم مقاصد کا حصول چاہتے ہیں۔

وزیراعلیٰ نے اہلکاروں کی شہادت اور زخمی ہونے پر دلی دکھ اور افسوس کا بھی اظہار کرتے ہوئے کہا کہ بدامنی اور عدم استحکام پیدا کر کے بلوچستان کو پسماندہ رکھنے کی سازش کی جارہی ہے، ایسی تمام سازشوں کو عوام کی حمایت سے ناکام بنایا جائےگا۔

عبدالقدوس بزنجو نے شہید اہلکاروں کے خاندانوں سے تعزیت و ہمدردی کا بھی اظہار کرتے ہوئے کہا کہ عوام کی جان و مال اور ملک کے تحفظ کے لئے جانیں قربان کرنے والے قوم کے ہیرو ہیں۔ وزیراعلیٰ نے زخمیوں کی جلد صحتیابی کی بھی دعا کی۔

یہ بھی پڑھیں: دہشت گردی کے خلاف ہماری نہ ختم ہونے والی جنگ