کراچی: محکمہ تعلیم سندھ نے رمضان المبارک کے دوران اسکولز کے اوقات کار جاری کردیے۔

محکمہ سندھ کی جانب سے اسکولوں کے جاری کردہ اوقات کار کا نوٹیفکیشن بھی جاری کردیا ہے جس کے تحت اسکولز کی ٹائمنگ صبح 7:30 بجے سے 11:30 بجے تک ہوگی۔

نوٹیفکیشن میں کہا گیا ہے کہ جمعے کے روز صبح 7:30 بجے سے 10:30 بجے تک اسکولز میں تدریسی عمل ہوگا۔

محکمہ تعلیم کے جاری کردہ نوٹیفکیشن کے مطابق ڈبل شفٹ والے اسکولز کے اوقات کار صبح 11:45 سے 2:45 تک ہونگے۔

واضح رہے کہ مولانا سید عبد الخبیر آزاد کی زیر صدارت پشاور میں مرکزی رویت ہلال کمیٹی کا اجلاس آج شام اوقاف ہال میں ہوگا جس میں ماہ رمضان کے چاند کی رویت کا فیصلہ اور اعلان کیا جائے گا۔

اجلاس میں مركزی و زونل ممبران وزارت مذہبی امور ودیگر اداروں کے نمائندے شریک ہوں گے۔

بعدازاں غیر سرکاری رویت ہلال کمیٹی کا ایک اور اجلاس آج مسجد قاسم علی خان میں ہوگا جس کی صدارت مفتی شہاب الدین پوپلزئی کریں گے۔

پاکستان میں رمضان المبارک کا آغاز کب ہوگا؟ محکمہ موسمیات کا اہم اعلان

دوسری جانب پاکستان میں رمضان المبارک کے آغاز کے حوالے سے محکمہ موسمیات نے اہم پیشگوئی کر رکھی ہے۔

محکمہ موسمیات کی جانب سے جاری کردہ بیان کے مطابق رمضان کے نئے چاند کی پیدائش 21 مارچ کی شب 10 بج کر 23 منٹ پر ہوگی۔

یہ بھی پڑھیں: رمضان المبارک کا چاند دیکھنے کیلئے مرکزی رویت ہلال کمیٹی کا اجلاس آج ہو گا

اس بات کا قوی امکان ہے کہ 22 مارچ یعنی 29 شعبان کو رمضان المبارک کا چاند نظر آجائے گا، یعنی رمضان المبارک کا آغاز 23 مارچ کو ہونے کا امکان ہے۔

واضح رہے کہ اس سے قبل سعودی عرب کی القصیم یونیورسٹی میں فلکیات کے سابق پروفیسر اور موسمیات کی سوسائٹی کے ڈپٹی چیئرمین ڈاکٹرعبداللہ المسند نے کہا تھا کہ رواں برس ماہ رمضان کا آغاز 23 مارچ کو ہونے کا امکان ہے۔

اس کے علاوہ رواں سال قوی امکان ہے کہ پاکستان سمیت دنیا بھر میں رمضان المبارک کا آغاز ایک ہی دن ہوگا۔