خیبرپختونخوا حکومت نے مالی بحران سے نمٹنے کے لیے سخت اقدامات کرنے کا فیصلہ کرلیا ہے۔

تفصیلات کے مطابق ذرائع کا کہنا ہے کہ فنڈز اور دیگر وسائل کی بچت کے لیے محکمہ خزانہ نے وزیراعلیٰ کو سمری ارسال کر دی ہے۔

صوبے میں سیلاب اور زلزلہ سے متاثرہ علاقوں میں تعمیر و مرمت کے کام پر پابندی ہوگی، محکمہ فنانس یومیہ اجرت کے ملازمین کی بھرتیوں کی منظوری نہیں دے گا، توانائی بچت کے لئے دفاتر کے اوقات صبح 8 سے دن 3 بجے تک ہوں گے۔

ذرائع کے مطابق افسران کے سرکاری فنڈز پر ملک سے باہر جانے پر بھی پابندی ہوگی، نئی گاڑیوں کی خریداری پر پابندی ہوگی، سرکاری دفاتر میں پیپر دونوں اطراف سے استعمال کیا جائے گا، سرکاری محکموں میں جو فاضل آسامیوں کو ختم کیا جائے گا، صوبے کے تمام سرکاری دفاتر میں منرل واٹر کے استعمال پر پابندی ہوگی، سرکاری خرچ سے لنچ، ڈنر اور ہائی ٹی پر پابندی ہوگی جبکہ بیرون ممالک سے آنے والے مہمانوں کو بھی کھانے کی بجائے صرف چائے پلائی جائے گی۔

ذرائع کے مطابق مالی بچت کے لئے سرکاری میٹنگز زوم ایپ پر کرنے کی بھی سفارش کی گئی ہے، ہفتے میں جمعے کی چھٹی کے ساتھ 2 کی بجائے 3 چھٹیوں کی سفارش کی گئی ہے، جمعہ کی چھٹی کی صورت میں ضروری دفتری امور نمٹانے والا اسٹاف ورک فرام ہوم کرے گا اور محکمہ پی این ڈی کو منظور شدہ سکیموں پر نظر ثانی کرنے کے لئے آگاہ کر دیا گیا ہے۔