امیر جماعت اسلامی کراچی حافظ نعیم الرحمان نے کہا ہے کہ جیالےمیئرکاخواب پورانہیں ہوگا، کراچی کے لوگ کبھی پیپلزپارٹی کا ساتھ نہیں دیں گے۔

تفصیلات کے مطابق سندھ ہائی کورٹ  کے باہر میڈیا سے گفتگو کرتے ہوئے امیر جماعت اسلامی نے کہا کہ الیکشن کمیشن نےاپنی آئینی ذمہ داری پوری نہیں کی اور الیکشن کرانےکےلیےاقدامات نہیں کرسکا۔

انہوں نے کہا کہ کراچی میں بلدیاتی الیکشن کرانے کےلیے ہم نے جدوجہد کی لیکن الیکشن کمیشن سندھ حکومت، پی پی کے ہاتھوں یرغمال ہے۔

انہوں نے مزید کہا کہ ہم نے11یوسیزسےمتعلق عدالت میں درخواست دائر کردی ہے اور کئی یوسیز پرجعلی طریقے سے گنتی کی گئی، کئی یوسیز پرجماعت اسلامی کے ووٹس کوضائع کیاگیا جس سے الیکشن کمیشن،آراوز،سندھ حکومت، پی پی ایکسپوز ہورہی ہے۔

 حافظ نعیم الرحمان نے کہا کہ الیکشن کمیشن کو حق و انصاف کی بنیاد پر فیصلہ کرنا چاہیے لیکن الیکشن کمیشن پیپلزپارٹی کے نمبرز کو بڑھانا چاہتا ہے۔

یہ بھی پڑھیں: ہمارے نمبرز کم کرنا پیپلز پارٹی کا ایجنڈا ہے، حافظ نعیم الرحمان

ان کا کہنا تھا کہ سالوں سے الیکشن کرانے کےلئے لڑتے رہے الیکشن ہوگئے لیکن دوسرا مر حلہ پورا نہیں ہوسکا، بدقسمتی سے الیکشن کمیشن نے اپنی آئینی ذمہ داری پوری نہیں کی۔

انہوں نے بتایا کہ انتخاب ہوگیا ہے لیکن ابھی تک ہاؤس مکمل نہیں ہوسکا  ہے کیونکہ الیکشن کمیشن سندھ حکومت کے ہاتھوں یرغمال ہے۔

انہوں نے کہا کہ ہم نے آج درخواست دائر کی ہے کہ گیارہ حلقوں میں بھی فوری طور پر الیکشن کرائیں جائیں ۔

خیال رہے کہ 11 بلدیاتی یونین کمیٹیوں میں انتخابات کرانے کے معاملے پر امیر جماعت اسلامی کراچی حافظ نعیم الرحمن نے سندھ ہائی کورٹ سے رجوع کرلیا  ہے۔

11 نشستوں پر چیئرمین، وائس چیئرمین کے انتخابات نہیں ہوئے تھے اور امیدواروں کے انتقال اور دیگر وجوہات کی بنا پر نو وارڈز کے انتخابات نہیں ہوئے تھے۔

انہوں نے کہا کہ گیارہ نشستوں پر انتخابات کے لیے الیکشن کمیشن سے بھی رجوع کیا گیا ہے کیونکہ الیکشن کمیشن گیارہ نشستوں پر انتخابات کرانے سے گریز کر رہا ہے جبکہ ہمارا مطالبہ ہے کہ مئیرشپ کے عمل کو مکمل کرنے کے لیے فوری انتخابات کروائے جائیں اور الیکشن کمیشن کو فوری گیارہ نشستوں پر انتخابات کرانے کا حکم دیا جائے۔