حالیہ زلزلے میں سب سے زیادہ نقصان خیبرپختونخوا کو ہوا۔

تفصیلات کے مطابق این ڈی ایم اے نے زلزلے سے ہونے والے نقصانات کی رپورٹ شائع کر دی جس میں بتایا گیا کہ  حالیہ زلزلے میں سب سے زیادہ نقصان خیبرپختونخوا میں ہوا۔ زلزلے میں 11 اموات ہوئیں جن میں سے تمام افراد کا تعلق خیبرپختونخوا سے تھا۔ جاں بحق ہونے والوں میں 6 مرد، 3 خواتین اور 2 بچے شامل ہیں۔

این ڈی ایم اے کا کہنا ہے کہ زلزلے میں مجموعی طور پر 79 افراد زخمی ہوئے، خیبرپختونخوا میں 77 افراد زخمی جبکہ پنجاب میں 2 افراد زخمی ہوئے۔

رپورٹ میں بتایا گیا کہ زلزلے سے مجموعی طور پر 172 گھروں کو نقصان ہوا، این ڈی ایم اے۔ خیبرپختونخوا میں 169 جبکہ آزاد کشمیر میں 2 گھروں کو نقصان ہوا۔ خیبرپختونخوا میں 22 گھر مکمل طور پر تباہ ہو گئے ہیں۔

این ڈی ایم اے کے مطابق زلزلے میں مجموعی طور پر 19، خیبرپختونخوا میں 17، آزاد کشمیر میں 2 مویشی ہلاک ہوئے جبکہ خیبرپختونخوا میں 4 سکولوں اور 4 عمارتوں کو معمولی نقصان ہوا۔

رپورٹ کے مطابق گلگت بلتستان میں ایک مسجد شہید ہوئی، گلگت بلتستان میں مویشیوں کا باڑہ بھی گر گیا، غذر میں ساندی یاسین پل کو بھی جزوی نقصان ہوا جبکہ آزاد کشمیر میں مویشیوں کے ایک باڑے کو بھی جزوی نقصان پہنچا۔

ضرور پڑھیں؛ اسلام آباد اور گردونواح میں زلزلے کے آفٹر شاکس کا سلسلہ جاری