پاکستان تحریک انصاف کے جنرل سیکریٹری کراچی ارسلان تاج کو گرفتار کرلیا گیا ہے۔

تفصیلات کے مطابق پاکستان تحریک انصاف (پی ٹی آئی) نے ارسلان تاج کی گرفتاری کی تصدیق کرتے ہوئے بتایا کہ تحریک انصاف کے جنرل سیکریٹری کراچی ارسلان تاج کو ان کی رہائش گاہ سے گرفتار کیا گیا ہے۔

ارسلان تاج کی گرفتاری ، ارسلان تاج کے گھر کی سی سی ٹی وی فوٹیج حاصل کرلیں گئیں۔ فوٹیجز میں واضح پولیس کی نفری دیکھی جاسکتی ہے۔#BOLNews #PTI@ArsalanGhumman @PTIofficial pic.twitter.com/REt0scvwQ0

— BOL Network (@BOLNETWORK) March 12, 2023

ترجمان پی ٹی آئی کا کہنا ہے کہ ارسلان تاج کے گھر میں سادہ لباس کپڑوں میں پولیس اہلکار داخل ہوئے اور گھر پر توڑ پھوڑ کی گئی۔

ارسلان تاج کے گھر کی سی سی ٹی وی فوٹیج حاصل کرلی گئی ہے جس میں دیکھا جاسکتا ہے کہ تین پولیس کی گاڑیاں ارسلان تاج کے گھر کے باہر موجود تھی۔ فوٹیجز میں واضح پولیس کی نفری دیکھی جاسکتی ہے۔

ارسلان تاج کی والدہ کی گفتگو

ارسلان تاج کی والدہ نے بول نیوز سے گفتگو کرتے ہوئے کہا کہ بغیر وارنٹ کے پولیس نے ہمارے گھر میں چھاپہ مارا ہے، ہمارے گھر میں توڑ پھوڑ کی ہے، کوئی لیڈی سرچر ساتھ لے کر نہیں آئے تھے۔

والدہ نے بتایا کہ ارسلان کو کہا لے کر گئے ہے کچھ نہیں پتا، پولیس موبائل پر نصب نمبر پلٹ پر پیپر لگا ہوا تھا، سفید رنگ کی کار تھی ایک کالے رنگ کی ویگو تھی۔

راجہ اظہر کے گھر پر ایک بار پھر پولیس کا چھاپہ

دوسری جانب پی ٹی آئی رکن سندھ اسمبلی راجہ اظہر کے گھر پر ایک بار پھر پولیس کی جانب سے چھاپہ مارا گیا ہے۔

اس حوالے سے پی ٹی آئی رہنما راجہ اظہر اپنے بیان میں بتایا کہ پولیس اہلکار گھر کے باہر موجود ہے، میرے گھر والو کو ہراساں کیا جا رہا ہے۔

کراچی:تحریک انصاف کارکن سندھ اسمبلی راجہ اظہر کے گھر پر پولیس کا چھاپہ
براہ راست دیکھیں:https://t.co/U5ZPyjPsCu#BOLNews #PTI pic.twitter.com/MaG53RCs9X

— BOL Network (@BOLNETWORK) March 12, 2023

انہوں نے مزید بتایا کہ پولیس بغیر وارنٹ میرے گھر میں داخل ہوئی ہے، رات سے تین بار پولیس گھر پر آئی ہے، کس قانون کے تحت پولیس میرے گھر پر آئی ہے۔

پی ٹی آئی رہنماؤں کا ارسلان تاج کو فوری رہا کرنے کا مطالبہ

پاکستان تحریک انصاف (پی ٹی آئی) کے رہنما خرم شیر زمان نے ارسلان تاج کی گرفتاری کی مذمت کرتے ہوئے کہا کہ امپورٹڈ حکومت اور سہولتکاروں سے ارسلان تاج کی جان کو خطرہ ہے۔

انہوں نے کہا کہ کیا پولیس نے ارسلان تاج کو گرفتار کرنے سے قبل اسپیکر سے اجازت طلب کی تھی؟ ایک پارلیمنٹ کے رکن کو گرفتار کرنے سے پہلے قواعد و ضوابط طے کیے جاتے ہیں۔

پی ٹی آئی رہنما نے کہا کہ ارسلان تاج کو فوری رہا کرنے کا مطالبہ کرتا ہوں۔ اوچھے ہتھکنڈوں سے سندھ حکومت نے سسٹم کو بدبودار کردیا ہے، ایسی گرفتاریاں تحریک انصاف کے کسی کارکن کا حوصلہ پست نہیں کرسکتیں۔

خرم شیر زمان نے مزید کہا کہ ہم آزادی کی جنگ جاری رکھیں گے، ارسلان تاج، راجا اظہر منتخب نمائندے ہیں کوئی دہشت گرد نہیں، پی ٹی آئی اراکین کے گھروں پر چھاپوں کی شدید مذمت کرتے ہیں۔

امپورٹڈ حکومت بوکھلاہٹ کا شکار ہے

دوسری جانب پاکستان تحریک انصاف سندھ کے صدر علی زیدی نے ارسلان تاج کی گرفتاری پر ردعمل دیتے ہوئے کہا کہ ارسلان تاج کی گرفتاری کی پرزور مذمت کرتا ہوں۔

سابق وفاقی وزیر نے کہا کہ ارسلان تاج نے کونسا جرم کیا جسکی پاداش میں اسے گرفتار کیا گیا؟ یہ امپورٹڈ حکومت بوکھلاہٹ کا شکار ہے۔

انہوں نے کہا کہ ارسلان تاج جیسے نوجوانوں سے ہی یہ امپورٹڈ ٹولہ خوفزدہ ہے۔ گرفتاریوں سے نہ پہلے کبھی گھبرائے ہیں نہ اب گھبرائیں گے، ہم نے مافیاز سے لڑنے کا پختہ عزم کر رکھا ہے۔

علی زیدی نے مزید کہا کہ اس ملک میں سیاست کو جرم بنا دیا گیا ہے۔ ارسلان تاج کو فوری رہا کیا جائے۔

ارسلان تاج کو پولیس نے اغوا کیا ہے

پی ٹی آئی کراچی کے صدر آفتاب صدیقی نے بھی ارسلان تاج کی گرفتاری کی مذمت کرتے ہوئے کہا کہ ارسلان تاج کو پولیس نے اغوا کیا ہے، ان کو کہاں رکھا گیا پولیس کی جانب سے بتایا نہیں جارہا ہے۔

انہوں نے کہا کہ ارسلان تاج عمران خان کا سپاہی ہے اس لئے انتقام کا نشانہ بنایا جارہا ہے۔ ان کی گرفتاری کی پر زور مذمت کرتا ہوں۔

پی ٹی آئی رہنما نے کہا کہ تحریک انصاف ان گرفتاریوں سے نہ پہلے خوفزدہ تھی نہ آج ہے، جیلیں بھرجائیں گی حوصلے نہیں ٹوٹیں گے۔

آفتاب صدیقی نے مزید کہا کہ پی ٹی آئی کا ہر ٹائیگر فاشسٹ حکومت کو ٹف ٹائم دینے کیلئے تیار ہے، امپورٹڈ حکومت کے دن گنے جاچکے ہیں، پی ٹی آئی کراچی جلد اپنے لائحہ عمل کا اعلان کرے گی۔