نگران وزیراعلیٰ پنجاب محسن نقوی نے کہا ہے کہ میٹروبس سروس اور اورنج لائن میٹرو ٹرین پر طلبا وطالبات کو فری سفر کی سہولت دی جائے گی۔

تفصیلات کے مطابق نگران وزیراعلیٰ پنجاب محسن نقوی کی زیر صدارت صوبائی کابینہ کا 8 واں اجلاس ہوا جس میں نگران کابینہ نے صوبے میں میرٹ کے فروغ اور سفارش کلچر کے خاتمے کے لئے تاریخ ساز فیصلہ کیا اور کابینہ نے محکموں میں رولزنرم کر کے محکمانہ کمیٹیوں کے ذریعے بھرتیوں کا فیصلہ بھی کالعدم قرار دے دیا۔

اجلاس میں نگران وزیراعلیٰ پنجاب محسن نقوی نے کابینہ سٹینڈنگ کمیٹی برائے گندم کو روزانہ کی بنیاد پر گندم خریداری مہم کا جائزہ لینے کی ہدایت دی۔

 پنجاب کابینہ نے گندم خریداری پالیسی برائے 2023-24 کی منظوری دے دی اور پنجاب بھر میں گندم خریداری مہم کا آغاز 10 مارچ سے کیا جائے گا جبکہ پنجاب حکومت 35 لاکھ میٹرک ٹن گندم خریدے گی اور صوبہ بھر میں گندم خریداری کے لئے 395 سنٹرز بنائے جائیں گے۔

اس موقع پر نگران وزیراعلیٰ پنجاب محسن نقوی نے میٹروبس سروس اور اورنج لائن میٹرو ٹرین پر سفر کرنے والے طلبا و طالبات کے لئے بڑا ریلیف جاری کرتے ہوئے کہا کہ میٹروبس سروس اور اورنج لائن میٹرو ٹرین پر طلبا وطالبات کو فری سفر کی سہولت دی جائے گی۔

محسن نقوی نے محکمہ ٹرانسپورٹ کو طلبا وطالبات کیلئے فری سفر کی سہولت دینے کے لئے سمری جلد بھجوانے کی ہدایت بھی کی۔

اجلاس میں کابینہ نے میٹروبس سروس کو صبح 6:30 بجے کی بجائے صبح 6 بجے چلانے کا پلان طلب کرلیا۔

نگران وزیراعلیٰ پنجاب محسن نقوی نے کہا کہ ہزاروں مزدور میٹروبس پر سفر کرتے ہیں اور انہیں 7 بجے اپنے کام پر پہنچنا ہوتا ہے، 6 بجے صبح میٹروبس سروس شروع ہونے سے ہزاروں مزدور بروقت منزل مقصود پر پہنچ سکیں گے۔

اجلاس میں محکمہ خوراک کے فوڈ آپریشن کے حوالے سے سرکلر ڈیٹ میں 300 ارب روپے کمی کے پلان کی منظوری دی گئی۔

نان اے سی پبلک ٹرانسپورٹ کے کرایوں پر نظرثانی کے لئے وزارتی کمیٹی تشکیل دی گئی۔

راولپنڈی، اسلام آباد اور مری کیلئے جوائنٹ کوآرڈیینشن کمیٹی کے قیام کی منظوری دی گئی۔

آڈیٹر جنرل آف پاکستان کے پنجاب حکومت کے اکاؤنٹس کی 3 سالہ آڈٹ رپورٹس کی منظوری دی گئی۔

لاہور گیریژن یونیورسٹی کے وائس چانسلر کے عہدے پر تعیناتی کی منظوری دی گئی۔

اجلاس میں صوبائی وزراء، چیف سیکرٹری، انسپکٹر جنرل پولیس اور متعلقہ حکام نے بھی شرکت کی۔