پاکستان تحریک انصاف کے سینیئر وائس چیئرمین شاہ محمود قریشی نے کہا ہے کہ ہمیں سیاسی سرگرمیوں سے توجہ ہٹانے کے لیے کیسز میں الجھایا جا رہا ہے۔

سابق وفاقی وزیر شاہ محمود قریشی نے ایوان عدل میں میڈیا سے گفتگو کرتے ہوئے کہا کہ 8 مارچ کو فسطائیت کا مظاہرہ کیا گیا، ظل شاہ کی پوسٹ مارٹم رپورٹ میں تشدد ثابت ہوا۔

انہوں نے کہا کہ پولیس نہتے لوگوں پر حملہ آور ہوئی۔  کارکنوں کو پرامن رہنے کی تلقین کررہا تھا۔

شاہ محمود قریشی نے کہا کہ  ہمارے کارکن کی موت پر دنیا میں نوٹس لیا گیا، ہمارا کارکن شہید ہوا اور پرچہ عمران خان پر کر دیا۔

سابق وفاقی وزیر نے کہا کہ عمران خان پر 78کے قریب مقدمات درج ہوچکے ہیں، عدلیہ کا ہمیشہ احترام کیا اور آئندہ بھی کریں گے۔

انکا کہنا ہے کہ مریم صاحبہ کا لب و لہجہ ان پر ججتا نہیں ہے، انہوں نے جو طنزیہ گفتگو فرمائی وہ ان پر سجتی نہیں ہے۔

پی ٹی آئی کے وائس چیئرمین نے کہا کہ ایسے ہتھکنڈوں سے یہ تحریک انصاف کو روک نہیں پائیں گے، عوام میں مقبولیت بڑھتی جا رہی ہے۔

شاہ محمود قریشی نے مزید کہا کہ  پورے لاہور میں کنٹینر لگا کر شہریوں کو متاثر کیا جا رہا ہے، بظاہر یہاں نگران حکومت ہے لیکن یہ پی ڈی ایم کی ایکسٹنشن ہے۔

یہ بھی پڑھیں: تحریک انصاف قانون اور آئین کیلئے جدوجہد کر رہی ہے، شاہ محمود قریشی

اس سے قبل بول نیوز سے گفتگو کرتے ہوئے تحریکِ انصاف کے سینئر رہنما و سابق وفاقی وزیر خارجہ شاہ محمود قریشی نے بول نیوز کے کو چیئرمین شعیب شیخ کی گرفتاری کی شدید الفاظ میں مذمت کرتے ہوئے ان کی گرفتاری کو بلا جواز قرار دیا۔

شاہ محمود قریشی نے بول نیوز سے گفتگو کرتے ہوئے کہا کہ جمہوریت کی مضبوطی میں میڈیا کا اہم کردارہوتا ہے۔ حکومت آزادی اظہاررائے پرپابندی لگا رہی ہے۔

یہ بھی پڑھیں؛ بول نیوز کے شریک چیئرمین شعیب شیخ گرفتار