پاکستان تحریک انصاف (پی ٹی آئی) کے رہنما فرخ حبیب نے کہا ہے کہ نگران حکومت ہمارے کارکن کی شہادت کی ذمہ دار ہے۔

فرخ حبیب نے لاہور میں میڈیا سے گفتگو کرتے ہوئے کہا کہ کل ہمارے کارکن ظل شاہ کو شہید کیا گیا، کیا ظل شاہ کو شہید کرنے کے لئے 144لگائی گئی تھی؟

انہوں نے کہا کہ ظل شاہ کی شہادت کا ملزم محسن نقوی، آئی جی پنجاب اور بلال صدیق ہے، رانا ثناء اللہ نے ماڈل ٹاؤن میں لوگوں کو قتل کروایا۔

یہ بھی پڑھیں: لاہور میں دفعہ 144کی خلاف ورزی پر پی ٹی آئی کے درجنوں کارکنان گرفتار

پی ٹی آئی رہنما نے کہا کہ نگران حکومت چند دن کی ہے جو چلے جائے گی لیکن جن افسران نے کل قانون کو اپنے ہاتھ میں لیا اور ظل شاہ کو شہید کیا ہمارے متعدد کارکن کو زخمی کیا۔

فرخ حبیب نے مزید کہا کہ ہم ظلم کے خلاف آواز اٹھائیں گے، اپنے کارکن کے خون کو رائیگاں نہیں جانے دیں گے۔

دوسری جانب پی ٹی آئی رہنما حماد اظہر نے بھی میڈیا سے گفتگو کرتے ہوئے کہا کہ ملک میں جلد جمہوریت بحال ہوگی اور جلد آئین وقانون کا راج ہوگا۔

انہوں نے مزید کہا کہ جو یہ سوچ رہا ہے ہم جمہوریت کو ڈیلیٹ کر دیں گے اپنے ذاتی مقاصد کے لئے اسکے یہ خواب ہی رہ جائیں گے۔

واضح رہے کہ گزشتہ روز لاہور پولیس کی جانب سے شدید شیلنگ اور تشدد کے باعث پاکستان تحریک انصاف کا کارکن علی بلال عرف ضل شاہ شہید ہوگیا تھا۔

یہ بھی پڑھیں: پولیس کی شدید شیلنگ اور تشدد سے پی ٹی آئی کا کارکن شہید

 محکمہ داخلہ پنجاب کی جانب سے لاہور میں جلسے، جلوسوں اور ریلیوں پر پابندی عائد کی گئی تاہم عمران خان کی قیادت میں کل زمان پارک سے نکلنے والی ریلی میں شرکت کے لئے جمع ہونے والے کارکنان کو پولیس کی جانب سے گرفتار کیا گیا۔

پولیس کی جانب سے کارکنان پر لاٹھی چارج بھی کیا گیا جس کے بعد مال روڈ انڈر پاس میدان جنگ میں تبدیل ہوگیا اور کئی کارکنان زخمی بھی ہوئے جس میں خواتین کارکنان بھی شامل تھیں۔

اس حوالے سے پولیس ترجمان کا کہنا تھا کہ لاہور میں پی ٹی آئی کے کارکنوں کے حملوں میں 2 ڈی ایس پیز سمیت 11 اہلکار زخمی ہوئے جبکہ پی ٹی آئی نے مبینہ پولیس تشدد سے اپنے ایک کارکن کی ہلاکت کا بھی الزام لگایا۔