عوامی مسلم لیگ کے سربراہ شیخ رشید نے کہا ہے کہ میری ضمانتیں منسوخ ہوگئیں تو دھوم دھام سے سسرال جاؤں گا۔

سماجی رابطے کی ویب سائٹ ٹوئٹر پر اپنے جاری کردہ بیان میں شیخ رشید نے کہا کہ ایٹمی اور میزائل پروگرام مکمل محفوظ اور دباؤ سے پاک ہونے کا بیان انتہائی خوش آئند ہے، قوم جان دے سکتی ہے ایٹمی اثاثوں پر سمجھوتہ نہیں کرسکتی۔

ایٹمی اورمیزائل پروگرام مکمل محفوظ اوردباؤسےپاک ہونےکابیان انتہائی خوش آئندہےقوم جان دےسکتی ہےاثاثوں پرسمجھوتہ نہیں کرسکتی حکومت نےمیری ضمانتیں منسوخ کرنےکےلیےکل اپیل دائرکی ہوئی ہےاگرمیری ضامنتیں منسوخ ہوگئیں تودھوم دھام سےسسرال جاؤں گاکیس بلورانی کی ٹویٹ ہےجوجیل سےبھی کروں گا

— Sheikh Rashid Ahmed (@ShkhRasheed) March 17, 2023

سابق وفاقی وزیر نے کہا کہ حکومت نے میری ضمانتیں منسوخ کرنے کے لیے کل اپیل دائر کی ہوئی ہے، اگر میری ضمانتیں منسوخ ہوگئیں تو دھوم دھام سے سسرال جاؤں گا، کیس بلورانی کی ٹوئٹ ہے جو جیل سے بھی کروں گا۔

انہوں نے کہا کہ دوست ممالک موجودہ حکومت کو سمجھتے ہیں اس لیے 6ارب ڈالر کی یقین دہانی نہیں کرارہے، آئی ایم ایف اسٹاف لیول معاہدہ نہیں کررہی، ہم بجلی، پیٹرول، گیس کے نرخ بڑھا رہے ہیں۔

شیخ رشید نے مزید کہا کہ لاہور میں سیاسی ماحول بہت کشیدہ ہے جس سے پورا صوبہ متاثر ہے۔ چوروں اور چوکیداروں میں کبھی صلح نہیں ہوسکتی، 90دن میں الیکشن آئین کا سب کو حکم ہے۔

اس سے قبل اپنے ایک بیان میں شیخ رشید نے کہا تھا کہ آئی ایم ایف کی بیل ابھی بھی منڈیر نہیں چڑھی نہ دنیا میں ان کی کوئی لابی ہے، نہ بیرونی فنانسنگ کی یقین دہانی ہے۔ ان کو کوئی سنجیدہ نہیں لیتا، پیڑول 5 روپے اور ڈیزل 13 روپے مزید مہنگا کردیا ہے۔

انہوں نے کہا کہ کل دنیا کے تمام الیکٹرونک چینل پر زمان پارک کی کیشدگی پہلی خبر تھی، عمران خان کے 84 مقدمات پر دنیا لعن طعن کررہی ہے، عمران خان ریل میں ہو یا جیل میں حکومت سے نہیں سنبھالا جائے گا۔

یہ بھی پڑھیں: عمران خان کی جان کو نقصان ہوا تو حکمرانوں کو بھاری قیمت ادا کرنی ہو گی، شیخ رشید

عوامی مسلم لیگ کے سربراہ نے کہا کہ عدلیہ مریم نواز کے نشانے پر ہے وہ نہیں جانتی کہ فائنل گول عدلیہ نے ہی کرنا ہے اُس کے والد کو عدلیہ لائے گی یا اللہ لائے گا۔

شیخ رشید نے مزید کہا تھا کہ ملک افواہوں کی زد میں ہے، دنیا میں ہمارا معاشی بحران سوالیہ نشان بن گیا ہے اور حکومت خوابے خرگوش میں سوئی ہوئی ہے۔