سینئر نائب صدر اور چیف آرگنائزر پاکستان مسلم لیگ (ن) مریم نواز نے کہا ہے کہ ہمیشہ نواز شریف اور شہباز شریف نے ہی ملک کو مسائل سے نکالا ہے۔

تفصیلات کے مطابق مریم نواز کی زیر صدارت پاکستان مسلم لیگ (ن) گوجرانوالہ ڈویژن کی مرکزی تنظیم کا اجلاس ہوا جس میں گوجرانوالہ میں بھرپور تنظیمی کنونشن پر ڈویژن کے عہدیداروں اور کارکنوں کی کارکردگی کو سراہا گیا۔

مریم نواز نے اس موقع پر کہا کہ الیکشن ہو یا فسطائیت کا مقابلہ، گوجرانوالہ سب سے آگے ہے، ٹیم گوجرانوالہ نے پارٹی کے دیگر ڈویژنز کو چیلنج دیا ہے، امید اور یقین ہے کہ پارٹی کے تمام ڈویژنز اس چیلنج کو قبول کریں گے، تنظیمی کنونشن پارٹی کو مزید بہتر، مظبوط اور فعال بنانے کا ذریعہ ثابت ہوئے ہیں۔

ان کا کہنا تھا کہ آپ کی شناخت اور جماعت کو مٹانے والے اللہ کے کرم سے خود مٹ گئے، الحمداللہ، ہماری قیادت ایمان دار، نیک نام اور عوام کی کارکردگی کے امتحان میں سرخرو ہوئی، الزام لگانے والے آج منہ چھپاتے پھرتے ہیں، پتلی تماشہ کرنے والے گھروں میں قید ہوچکے ہیں، مشکل معاشی حالات میں ڈوبا ملک پہلی بار ہمیں نہیں ملا۔

ان کا کہنا تھا کہ ملک مسائل میں جب ڈوب جاتا ہے، تب ہی نواز شریف اور شہباز شریف کو آنا پڑتا ہے، آج مشکل ضرور ہے لیکن اللہ تعالیٰ کی مدد سے لوڈ شیڈنگ کے اندھیروں کی طرح معاشی اندھیرے بھی ختم ہوں گے، سازشیوں کی سازش ہے کہ معیشت نہ سنبھلے، ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا، عمران داری کا ٹرک ڈرائیوروں سمیت پکڑا جا چکا ہے۔

پارٹی کے مرکزی سینئر رہنما خواجہ آصف، پرویز رشید، رانا ثناء اللہ بھی اجلاس میں شریک تھے۔

یہ بھی پڑھیں؛ مریم نواز ایک بار پھر عدلیہ پر حملہ آور