سپریم کورٹ نے پنجاب اور خیبر پختونخوا میں 90 دن میں انتخابات کروانے کا حکم دے دیا۔

تفصیلات کے مطابق سپریم کورٹ میں پنجاب اور خیبر پختونخوا میں انتخابات سے متعلق ازخود نوٹس کیس کی سماعت کا محفوظ فیصلہ سنادیا۔

کمرہ عدالت میں شیخ رشید، فواد چوہدری، فیصل جاوید ،شبلی فراز اورشیریں مزاری سمیت  اٹارنی جنرل اور ن لیگ کے وکیل  موجود تھے۔

میڈیا نمائندگان کی بھی بڑی تعداد فیصلہ سننے کے لیے کورٹ میں موجود تھی جبکہ  بیرسٹر علی ظفر،فیصل چوہدری اور شعیب شاہین کے ساتھ دیگر سینئر وکلاء بھی عدالت میں موجود تھے۔

یہ بھی پڑھیں: نیب نے نئے قانون میں واضح نہیں کیا کہ کیسز نے کہاں جانا ہے، سپریم کورٹ

فیصلہ ویڈیو لنک کے ذریعے سپریم کورٹ کی کراچی اور لاہور رجسٹری میں بھی سنایا  گیا۔

سپریم کورٹ کے تین رکنی بینچ نے تین دو سے فیصلہ سنایا۔

عدالت نے پنجاب اور خیبر پختونخوا میں 90 دن میں انتخابات کروانے کا حکم دے دیا۔

جسٹس جمال خان مندوخیل اور جسٹس منصور علی شاہ نے درخواستوں کو ناقابل سماعت قرار دیا۔

سپریم کورٹ  نے اپنے فیصلے میں کہا کہ  کے پی میں الیکشن کی تاریخ دینا گورنر کی ذمہ داری ہے۔ گورنر خیبرپختونخوا نے انتخابات کا اعلان نہ کرکے آئین کی خلاف ورزی کی۔

فیصلے میں کہا گیا کہ  گورنر اسمبلی تحلیل کرے یا نہ کرے اسمبلی تحلیل ہونے کے بعد ہر صورت الیکشن 90 دن میں کروانے چاہیئں۔  گورنر اسمبلی تحلیل کرے تو تاریخ بھی دے گا۔

عدالت نے  گورنر کے پی کو الیکشن کمیشن کے ساتھ مشاورت کے بعد الیکشن کی تاریخ دینے کا حکم  دے دیا۔

یہ بھی پڑھیں: سپریم کورٹ نے 90 روز میں الیکشن نہ ہونے کو آئین کی خلاف ورزی قرار دے دیا

سپریم کورٹ نے اپنے فیصلے میں کہا کہ پنجاب میں انتخابات کی تاریخ دینا صدر کی ذمہ داری ہے۔ صدر نے 9 اپریل کو انتخابات کی تاریخ دی ہے جو آئینی طور پر درست ہے۔ پنجاب میں الیکشن 9 اپریل کو ہوں گے۔

فیصلے میں کہا گیا کہ اگر صدر کی جانب سے دی گئی تاریخ میں انتخابات ممکن نہیں تو پھر صدر الیکشن کمیشن سے مشاورت کرکے نئی تاریخ دیں۔

عدالتی فیصلے میں کہا گیا کہ خیبر پختونخوا سے متعلق صدر کا فیصلہ درست نہیں لیکن پنجاب سے متعلق فیصلہ آئینی ہے۔

چیف جسٹس عمر عطا بندیال نے کہا کہ  ہمارے سامنے اسمبلیوں کی تحلیل کے بعد تاریخ کا معاملہ آیا۔ آئین عام انتخابات سے متعلق وقت مقرر کرتا ہے۔

واضح رہے کہ سپریم کورٹ نے پنجاب اورخیبر پختون خوا کے انتخابات میں تاخیر سے متعلق از خود نوٹس کیس کی سماعت کے معاملے پر گذشتہ روز فیصلہ محفوظ کیا تھا۔