سندھ اسمبلی میں اپوزیشن لیڈر حلیم عادل شیخ نے کہا ہے کہ یہ لوگ پاکستان کو کھائی کی طرف لے جانا چاہتے ہیں جبکہ ملک میں آئین کو تقریباً ختم دیا گیا ہے ۔

تفصیلات کے مطابق میڈیا سے گفتگو کرتے ہوئے کہا ہے کہ اس ملک میں آئین کو تقریباً ختم دیا گیا ہے اور بنانا ریپبلک بنا دیا گیا ہے۔

انہوں نے کہا کہ تمام تر صورتحال کے بعد اب سپریم کورٹ واحد امید رہ گئی ہے آئین پاکستان کو بچانے کے لئے سپریم کورٹ سے اپیل کرتے ہیں اور سپریم کورٹ میں پٹیشن دائر کرنے جارہے ہیں۔

انہوں نے مزید کہا کہ آئین کہتا ہے نوے دن میں انتخابات ہونے ہیں  اور سپریم کورٹ بھی الیکشن کروانے کا حکم دیتا ہے جس پر گورنر پنجاب اور کے پی نے سپریم کورٹ کے احکامات پر عملدرآمد نہیں کیا اور سلیکٹڈ الیکشن کمیشن بھی غیر آئینی فیصلہ کرتے ہوئی الیکشن ملتوی کردیتا ہے ۔

یہ بھی پڑھیں: ملک بھر میں آئین شکنی ہورہی ہے، حلیم عادل شیخ

حلیم عادل شیخ نے کہا کہ الیکشن کمیشن اور وزیروں کے خلاف آرٹیکل چھ کے تحت کارروائی ہونی چاہیئے ۔

ان کا کہنا تھا کہ پاکستان میں سویلین مارشل لا لگادیا گیا ہے  جبکہ نامعلوم افراد جوڈیشل کمپلکس میں حملہ کرتے ہیں  اور یہ چاہتے ہیں حالات خراب کرکے عمران خان کو مار دیا جائے ۔

انہوں نے بتایا کہ تحریک انصاف کے ذمہ داران کو اغوا کیے جانے کا سلسلہ جاری ہے  جس کے تحت صدیق جان پر بھی مقدمہ بنا دیا گیا  جبکہ وہ تو رپورٹنگ کررہا ہے۔

انہوں نے مزید کہا کہ پنجاب کا وزیر اعلیٰ زرداری کا بہادر بچہ ہے  اور ہمیں ڈر ہے مرتضی بھٹو کی طرح عمران خان کو بھی قتل نا کردیا جائے۔