بیرون ملک جانے کے خواہش مند پاکستانیوں کے لیے بڑی خوشخبری آ گئی ہے۔

تفصیلات کے مطابق وفاقی وزیر برائے اوورسیز پاکستانیز ساجد حسین طوری نے میڈیا سے گفتگو کرتے ہوئے کہا کہ حکومت رواں سال 10 لاکھ پاکستانیوں کو روزگار کیلئے بیرون ملک بھجوائے گی۔

انہوں نے کہا کہ سعودی حکام ویزے دینے جلد پاکستان آرہے ہیں، جرمنی، یونان اور رومانیہ سمیت دیگر 50 ممالک کے ساتھ بھی ورک ویزوں کے نئے معاہدے ہو رہے ہیں۔

ان کا کہنا تھا کہ سعودی وزارت محنت کے حکام ویزے دینے جلد پاکستان آئیں گے، فنی تربیت کاٹیسٹ پاس کرنے والے پاکستانی سعودی ویزے لے سکیں گے۔

ساجد حسین طوری نے کہا کہ جاپان نے پاکستانی ہنر مندوں اور مزدوروں کیلئے ویزے کھول دیے ہیں جبکہ جنوبی کوریا میں 10 ہزار پاکستانی ہنرمندوں کی مانگ ہے جو جلد جائیں گے۔

انہوں نے کہا کہ جرمنی اور رومانیہ میں بھی پاکستانیوں کو ورک ویزے مل رہے ہیں، پرتگال اوریونان کے ساتھ بھی پروفیشنلز اور لیبرویزوں کے معاہدے ہوں گے۔

ان کا کہنا تھا کہ مالٹا کے ویزوں کی فائل وزارت داخلہ میں رک گئی ہے، وزرات داخلہ کو بتادیا کہ مالٹا میں پاکستانی قونصلیٹ ہے نہ سفارت خانہ، وزرات داخلہ اٹلی میں سفارت خانے کے ذریعے ویزوں کا معاملہ حل کرنا چاہتی ہے۔

وفاقی وزیر برائے اوورسیز پاکستانیز ساجد حسین طوری نے مزید کہا کہ اوورسیز پاکستانیوں کے 27 ہزار بلاک پاسپورٹ بحال کردیے گئے ہیں جبکہ یورپ میں لاکھوں غیر قانونی پاکستانیوں کا مسئلہ حل کرنے کی کوشش کر رہے ہیں۔