پاکستان علماء کونسل کے سربراہ علامہ مولانا طاہر اشرفی نے کہا ہے کہ ہم الیکشن وقت پر ہونے کا مطالبہ کرتے ہیں، جو بھی حکومت میں آئے اس کو حکومت کرنے دی جائے۔

مولانا طاہر اشرفی نے لاہور میں پریس کانفرنس کرتے ہوئے کہا کہ دوست ممالک کے بارے میں بیانات دیکھ بھال کر دیے جائیں، قوم جس کو منتخب کرے اس کو قانون اور آئین کے مطابق کام کرنے دیے جائیں۔

انہوں نے کہا کہ دوست ممالک پاکستان افواج اور عوام پر اعتماد کرتے ہیں، اگر عدلیہ انصاف کرے گی تو لوگ تعریف کریں گے، چیف جسٹس جانے والے ہیں جو بے گناہ ہیں ان کی رہائی کا حکم دیں، چھٹیاں قربان کرکے عوام کو انصاف دیں۔

طاہر اشرفی نے کہا کہ چیف جسٹس آپ ویسے بھی جانے والے ہیں عوام آپ سے انصاف کی منتظر ہے، آپ اپنے پسند کے ججز چن لے اور اس گرمی میں جاکر بیرکوں کا دورہ کریں اور وہاں جاکر دو گھنٹے گزار کر دکھائے۔

انکا کہنا ہے کہ اس ملک میں نہ مدینہ کا نظام ہے نہ ہی کسی منصفانہ ملک جیسا نظام ہے، مدینہ کی طرز کی ریاست میں انصاف دہلیز پر ملتا ہے۔

چیئرمین پاکستان علماء کونسل نے کہا کہ حضرت عثمان رضی اللہ تعالیٰ کا پانی چالیس دن بند کیا گیا، انہوں  نے تب بھی صبر سے کام لیا یہاں تک کہ ان کو شہید کردیا گیا۔

انہوں نے کہا کہ آج ہمیں ریاست مدینہ بنانی ہے تو انصاف تو خلافت راشدہ کا نظام لانا ہوگا، ہم اس ملک میں حضرت عثمان اور حضرت علی رضی اللہ تعالیٰ کے دور جیسا انصاف دیکھنا چاہتے ہیں۔

انکا کہنا ہے کہ یہاں نہ تو کوئی توشہ خانہ کا پتا چلتا ہے اور نہ انصاف کا پتا چلتا ہے، لوگوں کو انصاف دینا ہوگا ان کی غربت ختم کرنا ہوگی۔

طاہر اشرفی نے مزید کہا کہ سوشل میڈیا پر مہم چلانے والوں کی گرفتاری کیوں نہیں ہورہی، پاکستان میں قوم اور فوج کو تقسیم کرنے کی کوشش کی جارہی ہے، اس کام میں 70 فیصد فنڈنگ بھارت سے کی جاتی ہے۔