اسلام آباد: پاکستان میں سائبر سیکیورٹی کے بڑھتے خطرات کے پیش نظر وفاقی حکومت نے سائبر سیکورٹی حملوں سے بچاؤ اور فوری ریسپانس کیلئے اہم قدم اٹھا لیا۔

اس حوالے سے وفاقی وزیر برائے انفارمیشن ٹیکنالوجی (آئی ٹی) سید امین الحق نے بتایا کہ وفاقی کابینہ نے کمپیوٹر ایمرجنسی ریسپانس ٹیمز رولز 2023 کی باضابطہ منظوری دے دی ہے۔

انہوں نے کہا کہ وزارت آئی ٹی نے 2021 میں ان رولز کی تیاری کا آغاز پیکا ایکٹ 2016 اور نیشنل سائبر سیکیورٹی پالیسی 2021 کے تحت کیا۔ سرٹ رولز 2023 کیلئے تمام اسٹیک ہولڈرز اور متعلقہ اداروں سے مکمل مشاورت کی گئی۔

امین الحق نے کہا کہ سرٹ رولز کے تحت کسی بھی حکومتی ادارے، محکمے میں سائبر سیکیورٹی سے متعلق معاملے پر فوری آپریشنل سہولیات و ٹیکنیکل ریسپانس فراہم کیا جاسکے گا۔

انکا کہنا تھا کہ رولز کے تحت سائبر سیکیورٹی حملے سے تحفظ کیلئے اسٹیٹ آف دی آرٹ رسک مینجمنٹ پروسیس کی سہولت فراہم کی جاسکے گی اور نیشنل، گورنمنٹ، وفاق، صوبائی و سیکٹورل سطح پر سرٹ ٹیموں کی تشکیل دی جائے گی۔

وفاقی وزیر آئی ٹی نے کہا کہ تمام کمپیوٹر ایمرجنسی ریسپانس ٹیموں کے مؤثر آپریشن کیلئے سرٹ کونسل کا قیام کیا جائے گا، قومی و سیکٹورل سرٹس سائبر سیکیورٹی سے بچاؤ اور مؤثر ریسپانس کے حوالے سے اپنا کردار ادا کریں گی۔

امین الحق نے مزید کہا کہ سرٹس ٹیمیں ملک بھر میں تمام اداروں کے سائبر سیکیورٹی حملوں سے متعلق مطلوبہ اقدامات ، سہولیات اور ریسپانس کی صلاحیتوں میں اضافہ کریں گی۔